WBC-in Whyte hmachhawn turin Fury hrilh

World Boxing Council chuan WBC heavyweight title kawltu Tyson Fury chu Dillian Whyte hmachhawn turin an ti a, boxer pahnihte chu inremna siam turin ni 30 chhung hun an pe.

Fury hian October 9 khan Deontay Wilder chu an in fight vawi thumnaah a hneh a, round 11-naah American fighter hi a knockout - WBC heavyweight title a kawl lai chu a humhim zui.

Las Vegas khawpuia Wilder a tukdawl hnuah khan Fury hian Oleksandr Usyk hmachhawn turin inchinfelna hun ni 30 a nei a, mahse, September-a Joshua hnehtu Usyk hian Joshua bawk a hnek nawn dawn.

Usyk hian Joshua hnehin, British boxer-in a kawl lai WBA, IBF, WBO leh IBO kawnghren a chuhsak a, Fury nen inhnek zui se chu professional boxing-a kawnghren langsar zual pali inchuhna a ni thei dawn.

Mahse, Joshua leh Usyk ten an inremnaah inhnek nawn theihna dan an ziak tel a, hei hi Joshua chuan remchangah lain a title hloh tawh lak let a tum a, Usyk hmachhawn nawn turin thutlukna a siam.

Hetiang a nih takah chuan Joshua hmachhawn tur hian WBC chuan Whyte an thlang ta a, boxer pahnih hi nakkum February emaw March-ah chuan inhnek tura ngaih an ni.

Boxer rothap pahnih hi an inhnek thei dawn a nih chuan Cardiff emaw Manchester khawpuiah emaw, an inhnek hi nghah a nih a rinawm thu khawthlang media-te chuan an tarlang.

Kum 33 mi Fury hian professional boxing-ah vawi 32 inhnek hmachhawn tawhin tlawm a la nei lo a, vawi 31 a khingpui hnehin vawi khat hi inhnehtawkah puan an ni.

British boxer-in a hneh-tawkpui awmchhun Wilder pawh hi a hnua an inhnek nawnna pahnihah a hneh ve ve a, vawi 31 a chak zinga vawi 22 chu a khingpui a knockout thei.

Kum 33 mi Whyte hian vawi 30 fight hmachhawn tawhin vawi 28 a chak a, heng zingah hian vawi 19 chu a khingpui a knockout - vawi hnih a tlawm.

Whyte-a hneh loh pahnih hi Anthony Joshua leh Alexander Povetkin an ni a, mahse, Russian boxer Povetkin lakah March thla khan phuba lain technical knockout hmangin an vawi hnih inhneknaah a hneh.