Santosh Trophy-ah Mizoram an tling zo ta lo ; Manipur 1 - 0 Mizoram
NorthEast aṭanga Santosh Trophy final round khel tur zawnnaah Mizoram bukin an awm a, an tling zo ta lo. Nimin tlai inkhelah Mizoramin inelna thlengtu Manipur 1-0 a an hneh loh avangin Santosh Trophy-ah beisei tur an nei tawh lo a, nakkuma neih tur National Games-ah an tel dawn lo bawk.
Nimin chawhma khan Nagaland-in semifinal beiseina la nei Tripura chu 6-0 zetin an sawp a, Tripura beiseina a tawp. Manipur-in beiseina thar an nei thung a, Gift Raikhan-a hoten Khuman Lampak Stadium, Imphal-ah minute 63-naa Ng Bedeenpar Moyon goal hmanga Mizoram hnehin final round an lut.
Thil awm dan
Group match hnuhnung ber khelh hmain Mizoram, Manipur leh Tripura ten final round luh beiseina an la nei vek a, Nagaland erawh an tla tawh. Tripura-in match hnuhnung bera Nagaland an hneh theih chuan an tling dawn a, hetiang result hi a thleng a nih chuan Manipur tan final round lut turin goal thum tala chak a ngai dawn.
Manipur duhthusamin thil thleng a, Nagaland-in beisei tur an nei tawh lo chungin Tripura 6-0 in an sawp. Nagaland chhuanvawr Laiwang Bohham chuan minute riatna lekah a khung a, Delhi FC forward hian hattrick a siam zui bakah a khat mawi tawkin goal an khung.
Nagaland tan Laiwang Bohham bakah hian Kakhevi Assumi, Visalie Mezhu leh Pursunep ten goal khat ṭheuh an khung a, 6-0 in Tripura an sawp. Dinesh Kumar Pradhan kaihhruai Tripura an tlawm takah chuan Manipur tan final round lut turin chak hrim hrim a tawk.
Pressure a sang
Mizoramin striker Lalhriatpuia chu hrem vangin an chhawr thei lo a, loh theih loin tlarhma an siksawk a ṭul. Farkawn tlangval Hriata aiah Salem Veng tlangval David Lalchhuanawma chu tlarhmaa mal tlat turin an dah lut.
Pressure sangah coaching staff-in ruahmanna thar an nei a, Manipur tlarhma dang turin tlarhnung an siksawi. Captain Lalrinchhana Tochhawng nena inkawp turin Lalmuanawma (Munez) aiah Lalmawizuala an thlang a, mual sirah Under 21 player pahnih F. Malsawmzuala leh Lalremruata te an awm.
Midfield laiah Lunglei tlangval pahnih Lalnuntluanga Bawitlung leh Lalengzama Vangchhia bakah Hnahthial tlangval K. Lalrinfela te bawk an inkawp a, mual sirah Under 21 player Lalbiakhlua leh Lalsawmzela te an awm. Sawmzela hi HK Lalhruaitluanga aiin an lut a, Tripura hnehtu Mizoram team aṭangin player pathum a thlak.
Goal khat
Coach tawnhriat nei ṭha Gift Raikhan-a'n Tripura laka an tlawm chungin tlarhnung panga an thlak lo. Goal mamawh tih hriain tlarhma lamah erawh player pathum a thlak danglam thung. Manipur-in an dinhmun an hrechiang a, ṭan phat aṭangin a nawrtu zawk an ni.
Manipur-in inkhel an thunun a, goal hmaah ball an duhtui hret avangin keeper Muanawma'n hna a nei meuh lo. Mizoram pawhin chance an nei a, Nagaland laka goal awmchhun khungtu B. Tluanga'n goal ban a tauh per.
Mizoramin hneh lo hret mah se defensive game khelh an tum bik lo. Second half ṭantirhah chance ṭha an nei a, striker David-a'n keeper chiah a hmachhawn hnuah goal zawnah a pet lo. Manipur goal bawh a na a, keeper chiah an hmachhawn hnuah an khung bik lo.
Minute 63-naah Manipur captain Salam Johnson Singh thawhrah sengin Bedeenpar Moyon-a'n awlsam takin a khung. Manipur-in goal hlu bik an khung avangin final round lut turin goal humhim a tawk. Mizoramin siphurh sut tumin bench aṭangin HK Lalhruaitluanga, Vanlalthanga leh Eric Remruatpuia Chhangte luhtir mah se goal an keng tel lo.
Mizoram keeper Muanawma a che ṭha a, Manipur-in goal dang an khung belh lo. Manipur-in kum 2014 qualifying phuba an la a, an mualah Mizoram hnehin final round an lut.
A pawi vawng vawng
Tling thelh apiang pawi tih a zual tih ang deuhin Mizoram tlin loh dan a na zual. Mizoram coach Samson Ramengmawia chuan, "Kan khelh ṭhat loh ṭum kan tawng a, Manipur an khel ṭha ve bawk. Kan player-ten tawnhriat an la ngah tawh lo a, pressure a sang si avangin kan tlin ta lo a ni," tiin Vanglaini a hrilh.
Mizoram hi kum 2019 khan final round atan an tling zo lo a, nikumah final round tling mah se khelh a nih tak si loh avangin kum thum a zawnin final round an khel dawn ta lo a ni.
Manipur coach Gift Raikhan chuan, "Mizoram an ṭha a, kan vannei zawk a ni. Kan muala khel kan ni a, entu mipui puihna nen kan chak. Final round kan thleng hi ka lawm a, Mizoram erawh ka tawrhpui hle. Naupang hmabak nei êng tak tak an ni a, hnual miah lo turin ka chah duh a ni," tiin Aizawl FC coach hlui chuan Vanglaini a hrilh ve bawk.