Isak-a'n goal mawi a khung; Odisha a chakpui

A hming chu Isak Vanlalruatfela a ni a, Thingsulthliah tlangval a ni. Thawhlehni zan khan Odisha FC forward hian East Bengal lakah Indian Super League-a a goal hmasa ber a khung a, Kolkata club lakah Mizo player pariat kawltu Odisha chu 6-4 in hnehna a chanpui.

Isak-a goal khung hi Mizo tlangval tho Isaac Vanmalsawma siamsak a ni a, Hnahthial tlangval hian match hnih an khelh tawh aṭangin assist vawi hnih a nei der - a 'form' rem rem hle.

Odisha-in league match hnih an khelh aṭangin hnehna an la chang ve ve a, goal kua an khung tawh - an lamah goal nga a luh ve tawh avangin tlarhnung siamṭhat erawh an mamawh tih a lang.

A goal hma
East Bengal tan Daren Sidoel chuan minute 13-na lekah goal hmahruai a khung a, kum 23 mi defensive midfielder hi Ajax youth system chhuak a ni a, Indian football-a a season hmasa berah a tlangnel nghal hle.

Mahse, East Bengal an hlim rei lo - Levante defender hlui Héctor Rodas chuan rang taka goal hnih khungin a rawn chhanglet nghal a, Spanish midfielder Javi Hernández chuan tun season-a a goal thumna a rawn khung ve bawk.

East Bengal-in Odisha an chhaih kawlh a ni ber a, Las Palmas aṭanga Odisha pantu Aridai Cabrera chuan second half-ah goal khat a belhchhah ve leh a, minute 75 tlin hmain 4-1 in hma an hruai der!

Isaac to Isak
Goal li an chhuah hnuah East Bengal an harh a, an la beidawng bik lo tih pholan nan Thongkhosiem Haokip chuan minute 80-naah Kolkata club tana khung ve leh a, beiseina an nei thar.

Mahse, Odisha-in Isaac leh Isak an nei - Jerry Mawihmingthanga thlaktu Isaac hian minute 82-naah Isak-a tan a siamsak a, Aizawl FC forward hlui hian ISL khel tlak a ni tih pholangin mawi zetin a khung.

East Bengal tan Daniel Chima Chukwu chuan goal hnih rawn khung ve leh a, goal khat hi penalty aṭanga lut a ni. Mahse, Kolkata club-in beiseina an nei rei hman lo - Aridai Cabrera-a'n Odisha tan goal khat a rawn khung leh a, 6-4 in an chak.

Beiseina
Season hmasa khan Isak Vanlalruatfela'n beiseina sang tak nen ISL club Odisha a zawm a, mahse, season tluanin match hnih chiah a khel a, a inlan zat minute belhkhawm chu minute 28 a ni!

Isak-a chuan, "Season hmasa kha chuan ka beidawng hman lek lek fo mai. Training-naah ṭha taka ka ti chung pawhin chance ka nei ngai lo a, hrehawm duh tak a ni.

"Mahse, ka tha ka thlah phah lo. Theihtawp ka chhuah reng a, ka hun a la inher chhuak ve ang tih hi ka beisei tlat ṭhin a ni," tiin Vanglaini a hrilh a, a hun a inher chhuak ta!

Hlimna
Bengaluru reserve team lamah pawh hun lo hmang tawh Isak-a hi tun season-a league match hnih an khelhah a inlan ve ve a, chutihrual chuan bench aṭanga lut ve ve a nih avangin khelmuala hun a hman zat hi minute 72 a ni.

Ruantlanga piang, Thingsulthliaha seilian forward chuan, "Season hmasa ka hun tawnte nena khaikhin chuan a mak zawk a, goal ka khung khan ka hlim em em ringawt mai a ni. Sawifiah dan pawh ka thiam lo," tiin Vanglaini a hrilh.

Isak-a chuan, "Ka hun tawn zelah a ṭha thei ang ber zela tih ka duh a, chance min pek apiang chu chhawr zel ka tum ang," a ti a, season duhawm tak hman chhunzawm a inbeisei.

Mizo tamna
Odisha-in Mizoram player pariat an kawlte squad-ah an la awm kim vek thei lo a, East Bengal nen an inhmachhawn zan hian Lalruatthara leh Jerry Mawihmingthanga te chuan inkhel bul an ṭan.

Bench aṭangin Isak leh Isaac-a te luhtir an ni a, Lalhrezuala Sailung leh Daniel Lalhlimpuia te erawhin bench lamah hun an hmang tluan thung.

Mizo player tam takin hming an lo chher tawhna East Bengal-ah Lalrinliana Hnamte chu Mizo awmchhun a ni a, Odisha nen an inkhelh ṭum hian bench lamah hun a hmang.

Inkhel Result
Odisha 6 - 4 SC East Bengal
ODI: Héctor Rodas 33', 40'; Javier Hernandez 45'; Aridai Cabrera 71', 90+3'; Isak Vanlalruatfela 82'
SCE: Daren Sidoel 13'; Thongkhosiem Haokip 80'; Daniel Chima Chukwu 89', 90'

Zanin Inkhel Tur
Jamshedpur FC 7:30 PM Hyderabad FC