LPS Fight Night 2 : World champion nih ka tum - NT-a

November 27 zanah NT Lalbiakkima chuan IBA intercontinental title a kawl lai chu Gerttipong Kumsahwat lakah humhim a tum dawn a, Siaha boxer hian a tum ber chu world champion a nih thu nimina media ho a hmachhawnnaah a sawi.

LPS leh Marine Pro Boxing Promotions chuan Dawrpui Multipurpose Hall-ah LPS Fight Night 2 an buatsaih dawn a, nimin khan LPS neitu Lalsawmliana Pachuau huaihawtin Hotel Regency-ah NT-a leh Mizo boxer inlan tur dang parukten media hmachhawnna an nei.

NT-a chuan, "Ka beisei ber chu world champion a ni a, beisei chu ka tisang ve khawp mai. IBA chauh ni loin WBA, WBC, WBO leh IBF thlengin ka mitthla a, tunah hian tawp ka tum lo," a ti a, a beiseina nena thlirin Kumsahwat lakah tlawm chi a ni lo.

A ngai reng

NT-a leh Kumsahwat te hi round 10 chhung inhnek tura tih an ni a, Mizo professional boxing huang chhungah heti zat round inhnek tura tih hi an la awm lo. Mahse, a dinna ngaiah NT-a a ding a, Fight Night khuhhawnnaa a lo sawi tawh angin round nga aia tam inhnek a inring lo!

Siaha boxer chuan, "Ka tumpui tur Kumsahwat hi boxer ṭha tak a nih avangin dah hniam ka duh lo a, chesual ve thei tho ka ni tih ka inhria. Mahse, a hmaa ka thusawiah ka la ding reng a, round nganaah chuan ka chinfel theih ka beisei," a ti.

NT-a chuan sawi zawmin, "Ka inbuatsaihna a ṭha a, ka coach Lalmuanpuia leh strength & conditioning coach Biakzuala (Gtea) ten theihtawp min chhuahpui reng bawk. A nihna takah chuan round nga pawh hi a tam mah mah mai thei," a ti a, IBA title a kawl lai chu humhim theih a inring hle.

Kumsahwat chu

Thai boxer Kumsahwat hian professional boxing-ah vawi 15 inhnek a lo hmachhawn tawh a, heng zingah hian vawi ruk chakin vawi kua a tlawm - a record aṭanga teh erawh a rem lo.

NT-a leh Kumsahwat te inhnekna tur hi minimumweight a ni a, Thai boxer hian a inhnek zinga tam zawkah a weight chung light flyweight leh flyweight-ah inhnek hmachhawn a ching a, record a neih chhiat phah.

Kumsahwat-a'n a professional career-a vawi ruk a chak zinga vawi ngaah hian a khingpuite a knockout a, hetah hian minimumweight-ah vek a inlan; NT-a tan chetsual palh chuan title hloh theihna tur a ni.

Khawiah nge en tur?

Fight Night hi LPS leh Chhimbal App-ten en theih turin an pe chhuak dawn a, chutihrual chuan inhnek en duh tan pay-per-view hmangin lei a ngai thung.

Fight pasarih ngawt a awm dawn avangin fight lei hi a manhla dawn. LPS-a en duh tan Rs. 60 sengin inhnek hi en theih a ni dawn a, mahni veng cable operator-te hnenah pek mai tur a ni.

Lalsawmliana Pachuau chuan, "Fight Night hmasa lamah inhnek ṭan vek tawh hnua lei duhte an awm leh a, a buaithlak tawh ṭhin. Inhnek en ngei duh tan lei hma hian chinfel a awlsam a ni," a ti.

LPS pawt remchang lo leh Mizoram pawn lama awmte tan Chhimbal app-ah en theih a ni dawn a, Rs.100+tax chawi a ngai dawn thung.

Chhimbal hi Google Play Store-ah download theih a ni a, inhnek en duh tan tunah a lei theih tawh - hei pawh a dawn hnaiha buaina a awm loh nan a rang lama lei fel a finthlak ang.

Engzat nge an hlawh dawn?

NT-a'n IBA title humhim tura fight a hmachhawn manah dollar 1,500 (Rs. 1,11,576.45) a hlawh dawn a, a khingpui tur Kumsahwat pawhin heti zat bawk hi a hlawh ang.

LPS neitu Lalsawmliana Pachuau chuan, "IBA nen inbiakna thar neih leh a ni a, main event-a inhnek tur boxer pahnih hlawh tur zat hi dollar 500 (Rs. 37,193) ve vein tihsan leh a ni mai thei," a ti.
Undercard-a inlan tur boxer-te hi a chak zawkin Rs. 30,000 an dawng ang a, a chak lo zawkin Rs. 20,000 an dawng bawk ang.

LPS-in PPV aṭanga an sum hmuh chu an chang vek dawn a, Chhimbal aṭanga sum hmuh 85% erawh Mizo boxer pasarihin an insem dawn a, 15% hi Chhimbal lamin an chang ang.

PPV share Mizo boxer pasarihten an insem dan turah hian ranking en a ni ang a, ranking sang lamin an chang hnem hret ang - NT-a chuan a chang hnem ber dawn chiang tihna a ni.

Mizo boxer an ṭha - a hmuhnawm dawn

LPS Fight Night-2 ah NT-a tih loh Mizo boxer dang paruk an inlan dawn bawk a, main event hma hauhin inhnek hmuhnawm chhawpsakin kan awm dawn tihna a ni.

NT-a te team NTP Boxing Team aṭangin Laldingliana a inlan dawn a, Tuipui boxer hian professional boxing a luhchilh hnuah vawi khat inhnek hmachhawnin a chak a, a hmaa ding tur hi vawi thum inhneka vawi hnih chaka vawi khat tlawm Rohit Mehra a ni a, featherweight-a a hmachhawn tur Haryana boxer hi a pumrua leh theihna enin zuam chi a ni lo ang tih a lang.

'The Animal' hming lem an pek Vanlalawmpuia'n super lightweight-a vawi thum fight a hmachhawn tawhah tlawm a la nei lo a, vawi khat hi draw result a ni. Hyderabad tlangval Suresh Pasham (2 win, 1 loss) lakah Khuangthing tlangval hi chak thei tura beisei a ni.

Cherhlun tlangval F. Zoram-chhana'n super bantamweight-ah Punjabi tlangval Sandeep Singh Bhatti (4 win, 2 loss) a hmachhawn dawn a, vawi hnih inhneka tlawm la nei lo Zotea tan tawnhriat nei ṭha boxer hmachhawn a awlsam lo ang.

Super welterweight-ah C. Lalhruaitluanga'n boxer ṭha Kamal Kant (4 win, 1 draw, 0 loss) a hmachhawn dawn a, a professional fight hmasa bera hnehna chang Mualpui tlangval tan hna a hautak dawn.

Chawngtlai tlangval HC Lalramfela'n lightweight-ah Parash Chauhan (0 win, 0 loss, 1 draw) a hmachhawn dawn a, Gujarat tlangval lakah vawi khat fight a neiha chak result hlawh chhuaktu Ramfela'n chak a beisei ang.

H. Lalrinhlua'n professional boxing-ah a vawi khat nan match a nei dawn a, Hnahthial tlangvalin a hnek tur Subin Augustine hi Hyderabad lam chhuak niin vawi khat inhnek a hmachhawnah a chak.

Undercard-a inlan tur zingah Laldingliana tih loh zawng boxer dang paruk hi Sete Boxing Academy chhuak vek an ni.