Tottenham ka zawm thei lo - Wilshere

Arsenal midfielder hlui Jack Wilshere chuan Tottenham Hotspur manager Jose Mourinho chu ṭha a tih thu a sawi a, mahse Spurs zawm chu a tan thil tih theih a nih loh thu a sawi chhuak.

England tana match 34 khel tawh Wilshere hi hliamin a tibuai ngun hle. Gunners aṭangin West Ham a zawm a, Hammers nen hian inhriatthiam tawnnain a contract an titawp, tunah hian club nei loin a awm.

Kum 28 mi Wilshere chuan, "Mourinho hi ka duh zawng a ni, coach ṭha leh chungnung tak a ni. Mahse Tottenham hian min duh a nih pawhin ka zawm thei lo ang, kei chu Arsenal mi ka la ni reng," a ti.

Wilshere hi player beiseiawm tak ni mah se hliam vangin beisei a phak lo. North London club tan match 197 a khel hman a, 2014 leh 2015 khan FA Cup nomawi a chawipui a, en elpui Spurs tana ngeiawm tur tak tak ṭawngkam pawh a lo hmang fo tawh.