Bayern player tel lohna Germany chak

Germany chuan Bayern Munich player tel loin Nilaini zan khan Czech Republic 1-0 in an hneh a, goal awmchhun hi minute 13-naa Luca Waldschmidt khung a ni.

Joachim Low-a'n season liam taa Champions League final khelh vanga match khel tam Bayern Munich player-te chawlhna remchang a siamsak a, Czech Republic nen ram tana inlan tam lo chhawr tamin Bavarians player a hmang lo.

Germany tana bul ṭantu zingah defender Antonio Rudiger, midfielder Ilkay Gundogan, Julian Brandt leh keeper Kevin Trapp te chu hming langsar deuh an ni. Goal khungtu Luca Waldschmidt hian chona thar hmachhawnin SC Freiburg aṭangin Benfica a zawm a, Portuguese club hian match liah goal li a khung. Ram tan kum 24 mi Waldschmidt hi vawi nga a inlanna a ni a, goal hnih a khung tawh. 

Waldschmidt goal khung tur siamsaktu Philipp Max tan zan duhawm a ni a, PSV Eindhoven left back hian minute 68 chauh a khel chungin a khel ṭha ber a tih theih. Mual vei lam aṭangin kum 27 mi Max hian ball ṭha a thlawh lut tam hle.

Kum 23 mi Florian Neuhaus pawh ram tana vawi hnih a inlannaah a khel ṭha a, Borussia Mönchengladbach midfielder hi Turkey nen friendly match an khelh ṭum khan a vawi khat nan inlanin goal a khung. VfL Wolfsburg midfielder kum 22 mi Bote Baku chu a vawi khat nan a inlan bakah Leeds United defender Robin Koch pawh tlarhnungah hman a ni bawk.

Germany coach Joachim Low chuan, "Goal hnihna kan khung theih loh avangin hun tawp lamah hna a harsat phah hle. Chutihrualin Covid-19 vangin inkhelh tur a tam a, player kan siksawi thiam a ṭul. Player tharte khelh danah ka lawm hle," tiin a sawi.

Die Mannschaft hian Nations League-ah Ukraine leh Spain te an hmachhawn chhunzawm dawn a, hnehna an chan ve ve chuan playoff an thleng thei ang.