Covid-19 kai chungin Vida a inkhel

Croatia chuan Nilaini zan khan friendly match-ah Turkey chu 3-3 in an inhnehtawkpui a, half time laiin Croatia captain Domagoj Vida chu Covid-19 kai chungin minute 45-a lo inkhel hman tih hriatchhuah a ni. 

Kum 31 mi centre back hi Covid-19 kai lo pawh ni se, second half-ah chuan luhtir lo a, Filip Uremovic luhtir chu Croatia lam tum dan sa a ni hrim hrim. Thawhṭanni khan player leh coaching staff-te chu test an nei vek a, an negative. 

Nilainiah khan a vawi hnih nan test an nei leh a, inkhelh chawlhlawk laiin Croatia medical team chuan Vida positive thu hi an hre ta a ni - Vida hi Istanbul khawpuiah a inkhunghrang zui. 

Istanbul-a inkhelah hian Turkey tan Everton aṭanga Crystal Palace-a loan-a khel Cenk Tosun chuan penalty hmangin goal hmahruai a khung a, Croatia-in Osasuna forward Ante Budimir hmangin an chhanglet. 

Mualneitu team tan Istanbul Basaksehir midfielder Deniz Turuc chuan an vawi hnih hmahruai nan khung ve leh mah se Croatia-in Atalanta  midfielder Mario Pasalic leh VfL Wolfsburg winger Josip Brekalo hmangin an chhanglet zui.

Mahse, Leicester City forward Cengiz Under chuan Turkey tan khung ve lehin, 3-3 in inkhel a tawp ta a ni.