Federer khumtu Medvedev

Mipa tennis thuneitu sang Association of Tennis Professionals (ATP) chuan world ranking thar a tichhuak a, hun rei tak chhung inkhel thei lo Roger Federer chu panganaah a tlahniam, a hmun ruakah Daniil Medvedev a awm thung.

Russian tlangval Medvedev hian kar hmasa khan Paris Masters title a la, a hlawhtlinna vang hian a ranking pawh a san phah. A chungah hian Novak Djokovic, Rafael Nadal leh Dominic Thiem te an la awm.

Swiss star Federer-a'n kuminah match a khel mumal lo. Beiseina sang tak nena a nghah Wimbledon chu hri leng vanga khelh theih a ni lo a, US Open leh French Open chu hliam vangin a khel lo bawk. Season tharah Australian Open a khelh theih a beiseiawm a ni.