Portugal tan Ronaldo-a'n goal a khung zel

Nilaini zan khan Portugal-in friendly match-ah Andorra 7-0 in an sawp a, goal khungtu zingah Cristiano Ronaldo a tel.

Estádio da Luz-ah Portugal tan Paulinho-a'n goal hnih (29', 61') a khung a; Pedro Neto (8'), Renato Sanches (56') leh Cristiano Ronaldo (85') ten goal khat ṭheuh an khung bakah Emili Garcia-a'n (76') an lamah a tilut bawk.

Goal khungtu ṭhahnem tak zingah Ronaldo a langsar leh a, Portugal captain goal khung a lansarh bikna chhan chu record a hnaih zel vang a ni.

Kum 35 mi Ronaldo hian Andorra laka a goal khung hi ram tan goal 102 a khungna a ni a, international football-a goal khung hnem lamah Iran striker Ali Daei (109) record chu goal sarih chauhin a phak tawh lo.

Portugal-in match pawi-mawh an hmabak avangin Ronaldo hi bench-ah an dah a, second half-ah luhtir chauh mah se World ranking-a 145-na Andorra lakah goal a khung tho.

Ronaldo hian September 8 khan Sweden lakah ram tana a goal 100 leh 101-na a khung a, amaherawhchu Covid-19 a kai avangin October 15-a Sweden nen an inhmachhawn ṭumin a inlan thei lo.

Juventus forward Ronaldo hian ram ṭha tak tak lakah goal a khung rualin ngam bik riau ram a nei a, Lithunia leh Sweden lakah goal sarih ve ve a khung tawh. Friendly match laka a goal khungna Andorra lakah pawh goal ruk a khung tawh bawk.

Portugal hian Nations League-ah Inrinni zan dar 1:15 hian France an hmachhawn dawn a, Thawhlehni zan dar 1:15-ah Croatia nen an inkhel dawn bawk. Ronaldo hian France lakah goal a la khung ngai lo a, Croatia lakah erawh goal khat a khung tawh.

Record duha tuihal Ronaldo tan match hmabak pahnih hi a chet ṭhat a ṭul dawn a, kum 35 mi a nih tawh avangin a hun ṭha neih bawhpelh loh a pawimawh.

Nakkumah European Championship khelh a la ni dawn a, Ronaldo hian ram tana inkhelh chawlhsan mai a la tum loh avangin record siam tura a goal mamawh goal riat hi a khung theih mai a beiseiawm hle.

Ronaldo hian kum 30 a tlin hmain Portugal tan match 118 a khel a, goal 52 a khung. Kum 30 a pelh hnuah match 48 a khel a, goal 50 a khung tawh. Uain ṭha mi ang maiin upat lamah Ronaldo a vul zel.