Hliam vangin Brazil an buai

Brazil chuan Inrinni zing dar 6:00 hian World Cup qualifying khel turin Venezuela an mikhual dawn a, world champion vawi nga ni tawh hian hliam an ngah avangin an dinhmun a ṭha tawk lo.

Neymar leh Philippe Coutinho bakah Casemiro, Fabinho leh Rodrigo Caio te chu hliam vangin an inlan thei dawn lo. Defender Eder Militao chu coronavirus vangin a inlan thei dawn lo bawk.

Brazil defender Thiago Silva, "Hun rei tak chhung in man taka khel ho tawh zingah hliam an awm chuan a buaithlak ṭhin, kan ṭhat theih dan berin kan khel thei dawn lo tih chu thil chiang sa a ni.

"Amaherawhchu hliam hi chu inkhelin a ken tel a ni a, chhuanlam siam theih a ni lo. Harsatna karah pawh ṭha takin kan khel thei a ni tih fiahna hun tur a ni ang, rilru paukhauh a pawimawh ang," tiin a sawi.

South America World Cup qualifier-ah Tite enkawl Brazil hian match hnih khel tawhin hnehna an la chang ve ve, an mikhual tur Venezuela erawh chak ni hmel la hmu lo an ni thung.

Tukin hian Lionel Messi awmna Argentina chuan Paraguay an hmachhawn ve thung. World champion vawi hnih ni tawh Argentina pawh hi Brazil ang bawkin an khel tawh chinah la chak ve ve an ni.

South America aṭangin ram 10 ten World Cup qualifier an khel a, an inkhel kual hnuah a sang pali an tling nghal ang. Pangana tan pawh kawng a la awm, inter-confederation playoff khelin an chak a nih chuan an la tling thei tho.