Damdawi in aṭangin Maradona a chhuak

Argentina legend Diego Maradona chu Nilaini khan damdawi in aṭangin a chhuak a, an ram khawpui Buenos Aires aṭanga 30km vel a hla, a fanu Giannina chenna bul Tigre hmunah enkawl chhunzawm a ni ang.

Kum 60 mi Maradona hi a thluak zai a ni a, amah enkawltu doctor Leopoldo Luque chuan hlawhtling taka an zai thu a sawi a, ni riat chhung damdawi inah enkawl a nih hnuin a chhuak thei ta a ni.

World Cup 1986 a an ram champion puitu hian a damdawi tih ṭhin a bansan tawh a, tunah chuan zu a la in nasa viau thung. A ruihhlo tihin a taksaah nghawng ṭha lo a nei a, hei vang hian enkawl a ngai zing viau.

Maradona dan hre mi Matias Morla chuan, "Diego kan bulah a awm leh thei ta hi a lawmawm, a natna tak an hre thei kha a lawmawm hle. Hre chhuak lo se la chuan thihpui theih tur a ni," a ti. Enkawl chhunzawm a nihna hmunah hian a ṭhian hnaite bak tlawh pawh an phal dawn lo.

A vanglai chuan Maradona hi midang chunga leng a ni a, Brazil legend Pele nen mi ṭhahnem tak chuan khawvel a football thiam ber tia sawi ṭhin an ni.