Pogba captain-na hnuaiah France chak lo

World champion France-in Nilaini zan khan Finland an mikhual a, Paul Pogba captain-na hnuaia Les Bleus hi 2-0 in an chak lo.

Mikhual Finland tan first half-ah Marcus Forss (28') leh Onni Valakari (31') ten an khung a, Didier Deschamps-a'n second half-ah Antoine Griezmann leh Anthony Martial te luhtir mah se a chhanletna an nei lo.

Finland tana goal khungtu Forss leh Valakari te hi kum 21 mi ve ve an ni a, ram tana an vawi khat inlanna ve ve a ni bawk. Forss hi Championship club Brentford tan a khel mek.

Inkhelh hmain Didier Deschamps-a'n Manchester United-ah Paul Pogba a hlim loh thu a sawi a, French manager chuan, "Paul hian a rilru tak tak min hrilh a, amah ka hrechiang bawk. Kawng dik chu a zawh leh ngei ang," tiin a sawi.

Amaherawhchu English club tana beisei pha lo Pogba hi France tan pawh a khel ṭha chuang lo a, minute 57-naah N'Golo Kante-a'n a thlak. French midfielder hi English club-in chhuah an phal tih thu thang a awm a, United-in hralh an phalna zat pawh tihniam tawhin pound maktaduai 53 chauh niin sawi a awm.

France hian Nations League-ah Portugal leh Sweden an hmachhawn dawn a, hnehna an chang ve ve a nih chuan playoff a khel thei ang.