Gomez a inhliam - Liverpool hma hun a thim?

Liverpool centre back Joe Gomez chu ram tana a fehchhuahnaah a inhliam a, kum 23 mi defender inhliam thu hriat hi Premier League champion tan thu hriat nuam a ni lo. 

England boss Gareth Southgate chuan, "A hliam dinhmun dik tak hi ka la sawi thei lo a, a na tuar lai hmuh erawh thil nuam tak a ni lo," a ti a, Gomez hi hun engemaw chen chu a chawlh a ngai dawn niin a lang. 

He thu buatsaih thleng hian Gomez dinhmun chiang taka puanzarna erawh a la awm lo a, English defender hi a khelhna club Liverpool medical team-in an enkawl zui ang. 

Reds hian Manchester City nen 1-1 a an inhnehtawkna inkhelah right back Trent Alexander-Arnold chu hliam vangin an chan tawh a, Virgil van Dijk leh Fabinho chu hliam vangin an chawl mek bawk. 

Covid-19 vangin fixtures a hautak lo thei lo a, chutiang karah chuan international break-ah ram tana inlan turin player koh an ni ve reng bawk - hei hian player-ah inhliam a thlen hnem phah hle. 

Liverpool boss Jurgen Klopp chuan Premier League-ah substitution panga tal neih a ṭulzia a sawi fo tawh a, mahse Premier League chief executive Richard Masters-a'n tun season-ah substitution panga hman an kalpui a rin loh thu a sawi tawh. 

German coach lu hai tawh sa belhchhah turin Gomez-a inhliam leh ta a, Liverpool damdawi in lun vanglai taka defender inhliam belh hi Reds tan chuan mangan lohna chi a ni lo. 

Liverpool-in centre back-ah tawnhriat nei ṭha defender dam an neih awmchhun chu hliam dam hlim Joel Matip a ni a, kum 19 mi Rhys Williams leh Nat Phillips an awm bawk!

Nathaniel Phillips hian tun season-ah Liverpool tan match khat chauh a la khel a, season hmasaa loan hmanga German second division lama inlan defender hian West Ham lakah a khel ṭha hle. 

Mahse, Joe Gomez nen an kum zat inang mah se huang khata dah chi an ni lo a, Klopp-a tan a career pumpuia top flight league match khat chiah la khel rin nghal hi a harsa ang. 

Kum 19 mi Williams hian tun season-ah Liverpool tan match nga a khel tawh a, Premier League-ah a la inlan miah lo thung - season hmasa khan English sixth division club Kidderminster-ah loan-in a khel. 

Mahse, Liverpool academy chhuak defender hian a hun neih chhunah a rintlakna erawh a pholang tawh a, chutihrual chuan rinrawla neih tur em chu niin a la lang lo. 

Sky Sports chuan Gomez-a hliam a serious thu an sawi a, VVD hi tun season chu inlan tawh lo tura ngaih a ni - Klopp tana thu lawmawm pakhat erawh Fabinho-a'n dam lam a pan. 

Brazilian midfielder hi Klopp-a'n centre back, tawnhriat nei ṭha chhawr tur Joe Gomez chauh a neih laia tlarhnung laia a chhawr a ni a, kum 27 mi midfielder hi centre back ni sa ang maiin a position tharah a tlangnel. 

Khawthlang media-ten an tarlan dan chuan Fabinho hi international break zawhah chuan club tan a inlan leh thei tawh dawn a, ani hi a inlan a nih chuan Phillips leh Rhy chu Klopp-a'n thlamuang takin bench lamah a dah thei dawn tihna a ni.

Liverpool hi midfield lamah pawh an indaih lutuk lo tih hriat tel erawh a ṭha a, Klopp-a'n ngaihtuahna fim tak nen team siksawi a thiam a ṭul dawn. 

City laka inhliam Arnold-a chawlh chen turah Reds-in tun thlengin thuchhuah an la nei lo a, international break-ah erawh ram aiawhin a feh chhuak lo. 

Khawthlang media-te chuan Arnold hi thla khat tal a chawl dawn niin an sawi a, kum 19 mi right back Neco Williams chuan English defender hmun ruak hi a luah theih a rinawm. 

Wales international hian season hmasa khan Reds tan inelna hrang hrangah match 11-a lo khel tawh a, tun season-ah match li a khel tawh bawk - Arnold ang em chuan a rintlak lo ang tih a chiang a, defender beiseiawm tak a ni. 

Hetihrual hian Jurgen Klopp-a'n a ṭulna hmun apianga chhawr theih turin James Milner a nei tel tih hriat a ṭha a, kum 34 mi midfielder hian hnathawh tura pek chu ṭha takin a hlen zel. 

Liverpool-in hliam vangin midfielder Thiago Alcantara an la chhawr mumal thei lo a, khawthlang media-te report hi rin tur a nih chuan Spanish midfielder hi international break zawhah a lo kir beisei a ni thung. 

Alex Oxlade-Chamberlain chu hliam vangin a la chawl hahdam mek a, English midfielder hi a dam  hun tur chiang taka sawi a la awm lo. 

Reds hian tun season-ah hliam leh Covid-19 vangin Alisson, VVD, Gomez, Kostas Tsimikas, Matip, Fabinho, Thiago, Naby Keita, Jordan Henderson, Ox, Xherdan Shaqiri leh Sadio Mané-te an chhawr thei lo tawh - heng zawng zawng ngaihtuah chuan league leh Champions League lama an result hi a la ṭha rih hle.

Liverpool hian November 21, zan dar 8:30-ah hmahruaitu leh team ṭha Leicester City an mikhual dawn a, he inkhel tur atana player hliam ngah tak Klopp-a inpuahchah dan tur hi hmuh châkawm a ni ta.