LPS Fight Night 2 khuhhawnna neih a ni ; Round nga a daih lo ang - NT Biakkima

Mizoram television channel lar LPS leh Marine Pro Boxing Promotions ṭang dun chuan a vawi hnih nan LPS Fight Night an buatsaih dawn a, nimin khan Mizoram sports minister Robert Romawia Royte office-ah LPS Fight Night 2 khuhhawnna hi neih a ni.

LPS Fight Night 2-ah hian Mizo professional boxer ngaihven hlawh NT Lalbiakkima chuan Mizoram leilunga a vawi khat nan fight a hmachhawn dawn a, IBA intercontinental title a kawl lai chu Thai boxer Gerttipong Kumsahwat lakah humhim a tum ang.

NT-a bakah hian Mizo boxer dang parukin fight an hmachhawn dawn bawk a, an hmachhawn turin state pawn aṭangin boxer an rawn lut ang - Dawrpui Multipurpose Hall-a neih tur Fight Night hi LPS leh Chhimbal app-ah te pay-per-view a en theih tur a ni dawn.

Siaha tlangval NT-a chuan, "Ka khingpui tur hi boxer ṭha tak chu a ni a, mahse, ka inbuatsaihna a ṭha a, ka in fit a, ka inpeih tawh bawk a, round nga aia tam inhnek a ngaih ka ring lo," a ti a, chak a tum ruh hle.

Fight chu
LPS Fight Night 2 hi International Boxing Association (IBA), USA leh Professional Boxing Commission hriatpuinaa neih tur a ni a, ring official tur hi PBC lam aṭangin an rawn kal dawn a ni.

Fight pasarih hi LPS leh Chhimbal app ten pay-per-view hmanga en theih turin an pe chhuak dawn a, LPS-a en man hi Rs. 60 a nih laiin Chhimbal erawh Rs. 100 + tax (chhiah) chawi a ngai dawn thung.

LPS pawt lo tan pawh Chhimbal app hmangin a en theih dawn tihna a ni a, Mizoram mai ni lo, Mizoram pawn aṭanga he inhnek en duhte chuan Chhimbal app hmang hian en mai tur a ni dawn a ni.

Chhimbal hi Google Play Store aṭangin a download theih a, Mizo professional boxer-te inhnek i phone hmangin i en thei dawn e.

Sum & a chhehvel
LPS-in PPV aṭanga an sum hmuh chu an chang vek dawn a, Chhimbal app aṭanga sum hmuh 85% erawh Mizo boxer pasarihin an insem dawn a, 15% hi Chhimbal lamin an chang ang.

Chhimbal app aṭanga LPS Figh Night hi en an tam chuan Mizo boxer an hlawk dawn tihna a ni a, LPS neitu Lalsawmliana Pachuau chuan, "Chhimbal aṭanga 85% share an neih hi Mizo boxer-te hian a inzat ṭheuhin an insem ang," a ti.

Main event-a inhnek tur NT-a'n dollar 1,500 (Rs. 1,11,731.25) chu a chak emaw a chak lo emaw a nih pawhin a dawng dawn a, hetiang zat bawk hi a khingpui tur Kumsahwat chuan a dawng bawk ang.

Inhnek dang parukah boxer chak zawkin Rs. 30,000 an dawng ang a, a chak lo zawkin Rs. 20,000 an dawng dawn bawk a ni.

NT-a a inpeih
Zo Keite hming lem an pek NT-a'n Thai boxer a hlau lo a, "Ka en hniamna a ni lo a, mahse, ka ṭhat lai ber min tawn dawn avangin a tan chuan title min chhuhsak a harsa ang," a ti.

Siaha boxer hian beiseina sang tak a nei a, tun hi a bul ṭanna chauh a nih thu a sawi. NT-a chuan, "Amateur-ah chuan international mai ni lo, international level thlengin ka lo tem tawh a, world number 1 meuh ka hneh tawh.

"Thil thar tem ka duh a, professional huang chhungah hian eng ang chiaha sang nge ka thlen theih hriat ka duh. Ka duh ber chu world champion nih a ni a, Mizoram mai ni lo, India tana bung thar kaipuitu nih ka duh a ni," a ti.

'Zo Keite' NT-a hi minimum weight-ah a inlan a, vawi hnih fight a neih tawhah a khingpui knockout ve vein minimum weight world ranking-ah 74-na a ni mek. World title fight turin ranking 50 chung lamah tal a awm a ngai dawn a, chumi tur chuan Kumsahwat hneh hi hna hmasa a ni.