Dan theih loh Bayern Munich

Bayern Munich chu kum khat chhunga Bundesliga goal 100 khung tling thei pahnihna an ni a, striker ṭha mi Robert Lewandowski chuan kumin chhunga a goal 60-na a khung bawk - German champion hian Inrinni zan khan Freiburg chu 2-1 in an hneh.

Allianz Arena-a inkhelah Thomas Muller-a'n goal khung theihna remchang nei mah se Leon Goretzka tan a siamsak a, defender Alphonso Davies thawhrah sengtu Lewandowski chuan an goal hnihna a khung bawk.

Bundesliga table-a pathumna ni thei Freiburg lamin hun tawp hma chiahin Janik Haberer hmangin goal khat an sut a, goal dang khung belh turin hun a awm tawh lo - anmahni mualah Bayern an chak.

Bayern hian thlasik chawlh hmain league match khelh tur paruk an la nei. Tun hma lama record lo siam tawh Cologne tluk turin goal khat chiah an mamawh tawh. Kum 1977 khan Cologne hian league goal 101 an lo khung tawh a ni.

Lewandowski an neih miau avangin Bayern hian recod awmsa hi an khum ngei a rinawm. Poland captain hian kuminah ram leh club tan goal 60 a khung tawh a, hetiang zat goal khung tur hian match 50 chauh a mamawh!

Inkhel dangah Borussia Dortmund chu RB Leipzig lakah 2-1 in an tlawm a, table-ah Dortmund hian hmahruaitu Bayern hi point liin an thlau ta; team nem leh squad chhah lo zawk an nih avangin Bayern umphak leh a harsa tawh ang.

Germany - Bundesliga
Mainz 1 - 1 Borussia M'gladbach
MAI: Silvan Widmer 76'
BOR: Florian Neuhaus 38'
Bayern Munich 2 - 1 Freiburg
BAY: Leon Goretzka 30'; Robert Lewandowski 75'
FRE: Janik Haberer 90+3'
Wolfsburg 1 - 0 Augsburg
WOL: Lukas Nmecha 14'
Stuttgart 0 - 1 Arminia Bielefeld
ARM: Masaya Okugawa
Bochum 2 - 0 Hoffenheim
BOC: Soma Novothny 66'; Milos Pantovic 90+7'
RB Leipzig 2 - 1 Borussia Dortmund
LEI: Christopher Nkunku 29'; Yussuf Poulsen 68'
BOR: Marco Reus 52'