Number 1 ni tlang tur Djokovic

Novak Djokovic chu tennis season kal laiah world number 1 a ni tlang dawn. Serbian star hi amah hnaih bertu Daniil Medvedev tan um phak theih a ni dawn tawh lo - number 1 ni chunga kum tawp hmang ngun thei ber record a siam ang.

Kum 34 mi Djokovic hian tun hmain vawi ruk ngawt number 1 ni chungin kum tawp a hmang tawh, tunah hian record nei ṭha ber Pete Sampras nen an intluk mek, kumin a zawh meuh chuan chuh buaitu awm loin Novak hi record nei ṭha ber a ni ang.

Paris Masters khelh laiah Djokovic-a'n Hubert Hurkacz hnehin final a lut, nizan khan US Open final-a a hneh loh Danill Medvedev nen nomawi an inchuh a, result erawh kan hre hman lo. Russian star hian semifinal lehlamah Alexander Zverev a lo hneh ve thung a ni.

Grand Slam champion hnem lamah Djokovic, Roger Federer leh Rafael Nadal te an intluktawk, nomawi 20 ṭheuh an chawi tawh. Number 1 ni chunga season tawp hman tam lamah erawh Federer leh Nadal te aiin Djokovic hi ṭum thum ngawtin a sang fal dawn ta a ni.

Paris Masters aṭang hian ATP Finals khel tur pawh an chiang ta. Hmun ruak hnuhnung ber chu Hubert Hurkacz-a'n a hnawh khat, ani hma hian - Djokovic, Medvedev, Stefanos Tsitsipas, Alexander Zverev, Andrey Rublev, Matteo Berrettini leh Casper Ruud te an inelna ang.