Liverpool-a career hman zawh duh Salah

Mohamed Salah chuan a club khelh mekna Liverpool-ah a career zawng zawng hman zawh a duh thu a sawi a, hmun dangin a lung a len rih meuh lo niin a lang.

Kum 29 mi forward hian season thar zawhah hian Liverpool-a a contract a hmang zo tawh dawn a, Merseyside club nen hian contract thar ziak turin an inbe mek - inremna erawh an la nei thei lo.

Salah chuan, "Anfield-a ka cham chhunzawm leh chhunzawm loh hi ka duhthlannaa innghat a ni lo a, mahse, min zawt a nih chuan ka career tawp thlenga he hmuna cham hi ka duh.

"Ka kutah erawh a awm lo a, club thutluknaah engkim a innghat a ni," a ti. Salah hian kar khatah £200,000 a hlawh mek nia sawi a ni a, a 'level' pui player dang nena khaikhinin a hlawh tam lo.

Player pakhat hlawha uchuak taka inseng ngai lo Reds-a contract thar ziak turin Salah hian kar khatah £400,000 hlawh a phut nia sawi a ni a, Liverpool tana a hlutna ngaihtuahin a awm lo hran lo.

Kum 29 mi forward hian kum 2017 khan AS Roma aṭangin Reds hi pound maktaduai 34-in a zawm a, match 214-ah goal 137 khungin assist vawi 51 a nei a, Champions League leh Premier League-ah a champion pui tawh bawk.

Salah chuan, "Tun dinhmunah chuan Liverpool hmachhawn zawnga khel tur hian ka in mitthla thiam lo a, a harsa dawn lutuk. Sawi pawh ka duh lo a, hrehawm ka ti ngawt ang," a ti.

Egyptian forward hian Reds tan tun season-ah hian inelna hrang hrangah match 11 khelin goal 12 a khung a, assist vawi li a nei tawh bawk. Nizan khan Manchester United nen an inkhel a, statistic hi he thuziak i chhiar meuh chuan a danglam leh tawh hial mai thei.