Champions League roreltu Real Madrid

Real Madrid chuan Inrinni zan khan 3-1 in Liverpool an hneh a, a zawna a vawi thum nan Champions League nomawi an chawi. Real tana danglamna thlentu chu Gareth Bale leh Liverpool goalkeeper Loris Karius an ni!

Karius hian vawi hnih ngawt Real chu goal a 'khilai' a, Karim Benzema leh Bale ten an hming chher nan an hmang. Liverpool tan Sadio Mane-a'n goal khat khung ve bawk mah se Reds phur lutuk tur tihtawp nan Bale-a'n ropui takin a volley goal a, tawnhriat ngah zawk Los Blancos-in hnehna an chang.

Liverpool chhuanvawr Mohamed Salah chu hliam vangin hma takah lakchhuah a ni a, Egyptian forward hi World Cup a khelh dawn leh dawn loh a la chiang lo.

Team hmuhnawm Reds
Inkhel ṭantir aṭangin Liverpool an hmuhnawm a, Mohamed Salah, Roberto Firmino leh Sadio Mane te inkawp ball inpe kual vel chu Real ṭantu tih chauh loh chuan hmuhnawm tiin an thlir vek ang.

Tlarhnungah European champion lai an bet thlap a, Liverpool game rang tudai turin ball an chan apiangin an in pass tam a, mahse Liverpool-in an nawr miau avangin tihsual an nei leh ṭhin. A tawi zawnga sawi chuan Cristiano Ronaldo aiin Keylor Navas hmel kan hmu ngun zawk.

Mahse, minute 30-naah Liverpool fan-ten an hmuh duh miah loh thil an hmu a, chu chu Mohamed Salah inhliam a ni. Sergio Ramos nen ball an inchuhna lama inhliam forward hian khelh luih tum mah se a hliam nat avangin a thei lo tih a inhria a, mittui nen lakchhuah a ni.

Salah tel lo Liverpool
Real Madrid captain Ramos-a'n defender tih tur dik tak a ti a, Liverpool manganna thlentu a ni. Salah lakchhuah a nih hnuah Reds player-te tawnhriat ngah lohna a lang nghal a, minute 30 chhunga inkhel thununtu kha an bet nghal!

Salah lakchhuah a nih hmain Liverpool hian Los Blancos goal-ah vawi kua ngawt pet goal tumin shot an nei hman a, Salah lakchhuah a nih hnu first half chhung zawngin shot dang an nei leh tawh lo.

Real Madrid erawh an hlauhawm telh telh thung a, Isco-a'n Reds fans thinphu ti rang turin bar a pet per dawp. Inkhel ṭantir lama phur Liverpool fan-ten chawlhlawk an nghakhlel a, hliam damkawr Adam Lallana-a'n Salah hmunruak a hnawhkhat thei lo.

Aw Karius, Vanlal Karius!
Chawlhlawk hman a nih hnuah Liverpool an zia hret a, mahse 0-0 a nih laiin holam takin Karius a chesual. Reds keeper hian a ball vawmna tur lam en loin ball a theh chhuak a, a bul lawka awm Benzema chuan lo changin goal-ah a chantir. Champions League final meuha ngaihsam taka che Karius a demawm takzet.

Mahse Liverpool hnual tak tak hmain minute li hnu lawkah Sadio Mane-a'n rang zetin si phurh sutna goal a khung a, minute 90 chhung khel ṭha Mane dang turin Navas tan tih theih a awm lo. Minute 61-na a ni a, Zinedine Zidane-a'n thutlukna dik a siam. Isco la chhuakin Bale a luhtir a, khelmualah minute li chauh hun a hmang hman tihin Welsh forward hian mawi zetin a volley goal.

Liverpool an beidawng lo, 2-1 a nih hnuah Mane-a'n post a pet per dawp a, Real-in an la him lo tih an hai bik lo. Mahse, hun tawp nan minute sarih chiah a awm tawh tihin Karius bawk a chesual leh a, German keeper hian Bale-a goal shot chu nam chhuah leh man turah thutlukna a siam fel hman lo a, an goal-ah a dang per lut. Liverpool tan thawh ngaihna a awm tawh lo a, Real Madrid an champion.

Inkhel Chhehvel
English club ten UEFA inelnaa final an hmachhawn hnuhnung pasarihah Spanish club vek an ngam lo (Champions League 4/Europa League 3). Jurgen Klopp-a'n major tournament final vawi sarih a lut tawh a, Borussia Dortmund tan 2012-ah DFB Pokal a chawi tih loh chu a tlawm vek.

Real Madrid-in 2016-17 Champions League final-a starting XI bawk an hmang nawn a, European Cup/Champions League final (replay tiam lohin) a starting XI hmang nawn awmchhun an ni. Karim Benzema-a'n Liverpool lakah Champions League goal li a khung tawh a, Didier Drogba nen CL-a Reds laka goal khung hnem ber an ni.

Liverpool chu Champions League-a player pathum goal 10 khung thei nei hmasa ber an ni (Salah 10, Firmino 10, Mane 10). Mane chu African player zinga Champions League final-a goal khung thei palina a ni.
Liverpool player pathum Mane (20 goals); Salah (44 goals) leh Firmino (27 goals) ten tun season-ah goal 20 an khung tling a, Liverpool-in season khata goal 20 khung tling thei player pathum an neih hnuhnung ber chu 1981-82 niin Dalglish (22), McDermott (20) leh Rush (30) ten goal 20 an khung tling vek.

Ronaldo dinhmun a chiang lo
Real Madrid fan-ten season thum chhung a zawna Champions League nomawi an chawina an lawm a, mahse thu lawmawm loh hriat tur an nei nghal–Cristiano Ronaldo dinhmun a chiang lo. Champions League-a goal 15 khunga top scorer Ronaldo chuan, "Rei loteah ka hma hun tur chu fan-te ka hriattir ang. Real Madrid-a ka hun hmante a hlimawm takzet a ni. Mahse, zaninah hian thawnthu thar kan ziak a, chu chu thil dang zawng aia pawimawh chu a ni," a ti.

Ronaldo-a'n Real chungchang sawi nan 'past tense' a hmang a, hemi chungchang zawhna chu, "Eng harsatna mah ka nei lo a, chu chu tunah a pawimawh lo bawk. Tunah chuan chawlh hahdam ka mamawh a, Portugal team nen kan inhmu thuai ang a, rei loteah ka dinhmun tur chu a chiang ang," tiin a chhang.

Kum 33 mi Ronaldo hian 2009 khan Real Madrid hi a zawm a, kum 1992-a Champions League format thlak a nih hnua he nomawi vawi nga chawi thei hmasa ber a ni. Manchester United tan vawi khat a champion a, Real-ah vawi thum a chawi–goal 120 khung tawhin he inelnaa goal khung hnem ber a ni.

Final-a goal khung lo Ronaldo hi goal a khung loh avanga a hnual leh hnual loh an zawt a, Portuguese forward chuan, "Engvangin nge ka hnual ang? Tu nge he nomawi chawi ngun ber a, tuin nge goal khung hnem ber? Champions League hi CR7 Champions League tia a hming thlak zawk tur an ni," tiin a chhang!

Team ropui tak kan ni – Zidane
Real Madrid boss Zinedine Zidane chuan, "He club nena Champions League nomawi vawi thum ngawt chawi chu a danglam a, team ropui tak kan nih hi. Eng thil ropui nge kan tih hi tunah tak hian a hriatthiam pawh kan la hrethiam chiah lo.

"Season kan hman danah duhthusam loh lai awm mah se nomawi chawi chunga kan khar thei erawh ka lawm takzet a, hlim takin kan champion hi kan lawm ang. Hei hi he club dinhmun dik tak chu a ni a, club ropui kan ni. Champions League-a vawi 13 champion thei kan ni a, he club chanchina ka hming a tel ve hi ka lawm a ni," tiin a hlim hle.

Real Madrid hi 1974-75 inkara Bayern Munich hnua Champions League/European Cup-a a zawna vawi thum champion thei hmasa ber an ni a, Zinedine Zidane chu Champions League-a vawi thum champion thei Liverpool coach ropui Bob Paisley leh Napoli coach thar Carlo Ancelotti te kiangah a hming ziahlan a ni ve ta bawk.

French manager hian coach ropui pahnih aia ropuina ala nei cheu–season thum chhung a zawna Champions League nomawi chawi thei manager hmasa ber a ni! Hetihlai hian Liverpool boss Jurgen Klopp tan erawh Anfield a pan hnua final-a a tlawm vawi thumna a ni thung–2016 khan League Cup leh Europa League final-ah an lo tlawm tawh.

World Cup khel lo tur Salah?
Liverpool coach Jurgen Klopp chuan Mohamed Salah hliam a serious thu a sawi a, "Hliam ngaihtuahawm tak a ni. Damawi In-ah X ray turin a kal a, a dinhmun a ṭha lo takzet," tiin inkhelh banah a sawi. Egyptian forward hi a dar a pelh nia hriat a nih vangin FIFA World Cup-ah a inlan hman a rinawm loh. Amaherawhchu Egyptian FA chuan Salah X ray result a hriat tawh thu an sawi a, ani erawhin 'inherh' ringawt nia an hriat avangin Russia-ah an hruai theih an la beisei fan a, he thu buatsaih lai hian thuchiang a la awm lo.

Darkar chanve khelh tlin hma hretin Real Madrid captain Sergio Ramos-a'n Eygptian forward Salah a keuh tlu a, referee Milorad Mazic-a'n Spanish defender-in Reds forward kut a man tih a hmuh miau loh avangin foul-ah pawh a ngai lo. Salah a insawhsual a, Liverpool tan tun season-a goal 44 khungtu Salah hian inkhelh luih tum mah se a khelh chhunzawm theih loh avangin mittui nen khelmual a chhuahsan.

June 14-ah World Cup khelh ṭan a ni tawh dawn avangin Salah inhliamin ngaihven a hlawh zual a, dar pelh a nih chuan Salah tan Russia rama inkhelh theih a rinawm loh. National Health Service chuan dar pelh dam tur hian kar 12-16 a mamawh thu an tarlang a, World Cup ṭan nan erawh kar hnih ṭha bak a awm tawh lo. Egypt hian an match hmasa berah Uruguay nen Salah hian enkawlna ṭha ber a dawng dawn tih chu a chiang a, amaherawhchu Liverpool defender hlui Jamie Carragher-a'n 2010-11 season a dar pelh vanga a inhliam khan thla hnih a chawl. Thil awm dan leh thlen tawh dan thlir chuan Liverpool forward Salah tan World Cup khelh a beiseiawm lo a, thu chiang erawh a la awm lo.

Klopp-a'n Karius a hriatthiampui
Karius-a'n Champions League final-ah vawi hnih ngawt a tisual a, Liverpool boss Jurgen Klopp chuan a goalkeeper dinhmun chu a hriatthiampui thu a sawi–Karius hian inkhelh zawhah mittui tla chungin Reds fan-te ngaihdam a dil.

Klopp chuan, "Vawi khat a tihsual tawh avangin a vawi hnihna kha chu a thleng chauh a ni. Vawi khat chetsual chuan rilru puitling tak put a harsa em em ṭhin. "Karius hian a tihsual a hria a, kan vaiin kan hre vek. A dinhmun ka hrethiam a, goalkeeper ṭha tak a ni," tiin chetsual palh theih a nih thu a sawi.

Liverpool captain Jordan Henderson pawhin Karius a chhan a, "Team angin final kan lut a, hnehna kan chan loh pawhin team pumpui vang a ni," a ti. Klopp-a'n Bale fak nghalin, "Awihawm loh khawpa goal ropui a ni. Kan tih theih zawng zawng kan ti a, mahse kan duh danin engkim a kal thei bik si lo," a ti.

German coach chuan inkhel thlirkirin, "Hnehna chan ngei tumin he hmun hi kan pan a, kan duh ang takin inkhel bul pawh kan ṭan. Mahse, Salah kan chan hnuah kan buai a, Real an ṭhat phah sawt thung.
"Keinin goal khat chiah kan khung a, anni chuan goal thum an khung thung," a ti a, chak phu zawkin hnehna an chan thu a sawi.