Nadal a dam thei rih lo

Rafael Nadal chu a ke phah hliam a la dam thei lo. Spanish star hian engtik hunah nge pangngai taka tennis a khelh leh theih ang tih pawh a sawi chiang thei rih lo, season thar tir lamah kan hmu thei lo hial mai thei.

Grand Slam vawi 20 champion tawh Nadal hi French Open hnuah hliam vangin a buai. Wimbledon aṭanga a inhnuhdawh bakah Tokyo 2020 a khel lo bawk; August thla khan Citi Open khel ve leh zuai mah se a hliam hi a la dam fel thei ta chuang lo.

Kum 35 mi Nadal chuan, "Ka hliam hi 100%-in dam fel phawt se tih hi ka duh dan a ni, nitin mai hian zawimuang chuan hma ka sawn. Mahse, engtik hunah nge ka lo kir leh ang, tih erawh ka sawi thei bik lo," tiin a sawi a, a hliam enkawl tute a rintawk thu a sawi bawk.

Nadal hi a inkhelh loh rei avangin a ranking pawh a hniam tawh, parukna dinhmun a la luah hram. Tournament khel loa a awm reng chuan a lo kir leh hunah a ranking a hniam dawn a, major tournament-ah a tir lamah player ṭha hmachhawn thei dinhmunah a ding dawn.