Hyderabad hnungzuiin playoff-ah CSK

Chennai Super Kings chuan Pathianni zan khan Indian Premier League playoff khel tura tling chiang tawh Sunrisers Hyderabad chu wicket riatin an hneh a, match hnih khelh tur la nei chungin playoff an khel dawn chiang.

Sunrisers Hyderabad tan opener Shikhar Dhawan chuan run 79 ngawt a vaw chhuak a, run 51 siamtu Kane Williamson-a'n a dan pangngaiin team tan a thawhhlawk hle bawk–Hyderabad hian over 20-ah run 179 an siam a, wicket li chiah an hloh.

Chennai Super Kings-in hnehna an chang a nih chuan playoff-a an hmun an tichiang dawn tih an hria a, SRH-in hmahruaitu nichunga qualifier 1 khelh an tumna tih khawtlai sakna remchang tih an hre bawk.

Chennai club tan opener Shane Watson chuan run 57 ngawt a rawn siam nghal a, a dinpui Ambati Rayudu chuan run 100 siamin a tawp thleng a dam bawk–over 19-ah CSK-in target an umpha a, wicket hnih chiah an hloh!

Pathianni zan inkhel dangah Jos Buttler chu player langsar a ni a, English batsman hian run 94 ngawt siama a tawp thleng damin Rajasthan Royals chu Mumbai Indians lakah wicket sarihin hnehna a chanpui.

Mumbai Indians hi bat hmasa zawkin over 20-ah run 168 an siam a, wicket ruk an hloh–run siam hnem ber Evin Lewis chuan run 60 a siam. RR tan Buttler a chet ṭhat avangin an target hi umphak harsa a ni lo a, over 18-ah umphain wicket thum chiah an hloh a, an chak.