Spanish GP-ah Mercedes an chungnung

Pathianni zan khan Formula 1 Spanish Grand Prix tlan a ni a, Mercedes team an che ṭha hle. Champion lai Lewis Hamilton chu pakhatna niin a hnungah hian a teammate Valtteri Bottas a thleng ve bawk.

Circuit de Barcelona Catalunya-a intlansiakah British driver Hamilton hian hnehna chang turin, darkar khat leh minute 35 bakah second 29.972 chhung hun a hmang a, tun season chhunga vawi hnih a chakna chiah a ni. Car intlansiakna sang berah hian ṭum 64 a chak tliang ta chiah bawk a, a tluk loh chu Michael Schumacher (91 wins) chiah a ni tawh.

Kum 33 mi Hamilton hian a tir aṭanga a tawp thlengin hnehna chang tur hian harsatna a tawk lo, point 95 hmuin hmahruaitu a nihna a sawhnghet. Ferrari driver Sebastian Vettel chu palinaah a thleng–German tlangval hian point 78 a nei ve tawh thung; anni pahnih hi season tluana inel leh tura ngaih an ni.

Force India driver Sergio Perez chu pakuanaah thlengin, a teammate Esteban Ocon erawh a tlan tluan ve thei lo. Spanish GP-ah driver an chesual nasa a, intlansiak bul ṭantu 20 zinga 14 chiahin a tawp an thleng thei a ni.