French Open tan chak a ngai – Halep

Simona Halep chuan Grand Slam nomawi chawi a chak thu a sawi a, hlawhtlinna a chan ngei theih nan tunkar chhunga khelh tur Italian Open-ah nomawi chawi hmasak a pawimawh thu a sawi.

Kum 26 mi Halep hian season hmasa khan Rome-ah final a thleng a, a vawi hnih nan Roland Garros-ah final a khel bawk–mahse a hlawhtling lo thung. Kuminah Australian Open final a khel leh tawh a, a beisei leh duh ber major title erawh a la thei rih lo.

Romanain star Halep chuan, "A nihna takah chuan ka tan Grand Slam hi inelna pawimawh ber a ni a, hlawhtlinna chan pawh ka chak hle. Chumi tur chuan inbuatsaihna ka neih ṭhat a ngai a ni," tiin a sawi.

Seeded pakhatna Halep hi first round-ah a bye a, Australian Open vawi hnih champion tawh Victoria Azarenka leh Japan nula Naomi Osaka te inkhela a chak zawk a hmachhawn dawn a ni.

Madrid Open nomawi a kawl lai hloh hlim Halep chuan, "French Open kan khelh hmain ruahmanna hranpa siam ka nei rih lo. Chutih rualin ka rilru leh taksa erawh chuan a nghakhlel tawh hle–inbuatsaihna ṭha ber chu Rome-a hlawhtlinna chan hi a ni," tiin a inkhelh thiamna hmun clay court-ah champion a tum hle.