Barcelona kaltluang lai titawptu Levante!

Tlawm miah loa Barcelona-in La Liga nomawi chawi an tumna chu tihtawp sak an ni ta–Pathianni zan khan rin loh takin Levante lakah 5-4 in an tlawm.

Barcelona hian tlawm miah loa La Liga nomawi chawi tur hian match hnih chiah hmabak an nei tawh a, an hmaa awm hi Levante leh Real Sociedad an ni.

Catalan club-in awlsam takin record an siam mai tura ngaih a ni a, beisei ang erawh a ni lo–beisei loh aṭangin Emmanuel Boateng a inlar a, Ghana rawlthar hian Barca tlarhnung chingpharin hattrick a siam.

Philippe Coutinho-a'n pound maktaduai 142 man a nih chhan pholangin hattrick siam mah se Barcelona chhanhim nan a tawk zo lo–hattrick siam pahniha langsar zawk chu Boateng a ni.

Thil thlen dan
9 mins (1-0): Boateng-a'n Jose Luis Morales hnen aṭanga a ball hmuh ṭha tak chu goal hmahruai ni turin a khung.

13 mins: Levante winger Enis Bardhi-a'n post a pet per!

30 mins (2-0): Hliam vangin Thomas Vermaelen lakchhuah a ni a, Boateng-a'n defender Nelson Semedo a tlanpelh hnuah goalkeeper Marc-Andre ter Stegen a tlan hel a, goal hnihna a khung.

38 mins (2-1): Coutinho-a'n yard 20 vela hla aṭangin si phurh a sut ṭhen a, Luis Suarez siam sak a ni.

46 mins (3-1): Bardhi a vanduai reng lo, Macedonian winger hian mawi zetin an goal thumna a khung.

49 mins (4-1): Boateng-a'n a goal thumna a khung a, a career-a hattrick a siam hmasak ber a ni.

56 mins (5-1): Mang ramah Levante an cheng chhunzawm a, Bardhi-a'n a goal hnihna a khung.

59 mins (5-2): Mualpho mek Barcelona tan Coutinho-a'n beiseina a siam a, an goal hnihna a khung.

64 mins (5-3): Coutinho-a'n Boateng hnungzuiin hattrick a siam a, Barca an phur sawt.

71 mins (5-4): Sergio Busquets tih tluk a nih hnuah Barca-in penalty an hmu a, Luis Suarez chuan a khung–Barca beiseina a nung.

90 mins: Busquets-a'n ball a back pass sual a, mah se he ball changtu Ruben Rochina chuan hnai takah a hlah.

94 mins: Hun tawp hamrik a ri a, Barcelona-in comeback an beiseina a thamral a, an mitthla tawh record chu nuai rehin a awm bawk.

Thutlukna dik lo

Barcelona boss Ernesto Valverde-a'n Levante lakah game hautak a beisei lo a, an thiampuipa Lionel Messi a chawlh hahdamtir–Argentine forward hi Levante-ah hruai tel a ni lo.

Mahse, Valverde-a'n a beisei loh 'Levante' a hmu a, mualneitu team hian minute 30 chhung lekin goal hnih an lo khung hman–Valverde leh Barca an hawihai a, an record siam tum a derthawng tih a lang.

Kum 1930 hnuah tlawm miah loin eng team mahin La Liga nomawi an la chawi ngai lo–hetih hunlai hian season tluanin match 18 chiah a la awm a, match 38 khelh a nih hnuah phei chuan tlawm miah loa nomawi chawi an la awm ngai lo.

Team dang tih theih loh Barcelona-in an ti thei ta bik lo a, Copa del Rey leh La Liga nomawi an chawi chian tawh bawk si avangin league match tawp bera Real Sociedad an hmachhawn tur chu captain chhuak tur Andres Iniesta thlahna ang chauh a ni tawh ang.

Levante harhna
Barcelona an tlawm a, Catalan club chak lo hian sawi a hlawh. Mahse, hei ai maha sawi phu zawk leh ngaihven hlawh phu rih zawk chu Levante boss Paco Lopez a ni a, kum 50 mi manager hnathawh hi hmuh hmaih chi a ni lo.

March thla khan Levante hi division hniam lama tla thei dinhmunah an ding mek a, relegation zone aṭanga an himna chu point khat chauh a ni. Reserve team aṭangin Paco chu coach puitlingah hlankai a ni a, hna ropui a thawk nghal.

Paco-a'n Levante a enkawl hnuah match 10-a enkawl a, vawi riat hnehna a chanpui! Tla thei dinhmuna ding kha 15-naah an invawrh chho a, table-a 18-na Deportivo La Coruna aia an sanna chu point 17 chauh a ni.

Lopez-a'n Barcelona nen an inhmachhawn hmain Catalan club hi an hneh a nih chuan an tan thil ropui tak a nih tur thu a sawi a, a sawi ang ngeiin hun tawp hamrik a rik meuh chuan Estadi Ciutat de Valencia-ah thawm a ṭha hle.