Mangṭha Carrick

Captain armband hreng chungin Michael Carrick chuan Pathianni zan khan Manchester United player nichungin a tawp nan Old Trafford a lut a, United tana khelhpuite leh an khingpui Watford player-te'n zahna lantir nan 'guard of honour' an pe.

United hian tun season Premier League-a an match hnuhnung berah hian minute 34-naa Marcus Rashford-a goal hmangin 1-0 in hnehna an chang. Goal awmchhun luh dan hian Carrick-a chanchin a sawifiah, English midfielder hian yard 40 aṭangin ball fing tak a pe a, offside trap bumtu Juan Mata chuan Rashford tan siam sak lehin English forward hian awlsam takin a khung.

Carrick hi goal khungtu leh assist neitu ni lo mah se goal luhna kawngah a ṭangkai em em a, English midfielder hian Manchester United a zawm hmaa Tottenham leh West Ham tana khelh lai pawhin langsar si loin team tan a ṭangkai ṭhin. Watford an hneh ṭum hian Carrick hi Red Devils player zingah ball a khawih tam ber a, pass a ngah ber bawk a, English midfielder hmunruak hnawhkhat hi a awlsam lo ang.

Inkhelh banah Carrick chuan, "Player, staff leh manager aiawhin min puihnaah lawmthu ka sawi a, hun harsa leh lawmawm kan tawng a, tunah chuan season kan hmang zo ta. Keima pualin min ṭan tawhna zawng zawngah lawmthu ka sawi a, kum 12 chhunga khawvel club ṭha bera ka hun tawn avang hian ka lawm takzet a ni," tiin a sawi a, amah lalututu Sir Alex Ferguson chu damthuai tura duhthu a sawi lang bawk.

Kum 36 mi Carrick chuan 2006 khan pound maktaduai 18-in Manchester United hi a zawm a, Premier League nomawi panga bakah Champions League, Europa League, FIFA Club World Cup leh FA Cup nomawi vawi khat ṭheuh a chawi a, League Cup nomawi vawi thum chawi bawk.

Manchester United assistant manager Rui Faria pawh season tawp rualin Jose Mourinho nen an inṭhen dawn a, Portuguese manager chuan, "Coaching staff hi ka rem ṭha dawn a, Rui Faria nen kum 17 kan inzui a, tun dinhmunah a thlakna tur ka hmu lo. Michael hian he hmunruak hnawhkhat tur hian theihna a nei a, coaching certificate te a neih hunah he hmunruak hi a luahkhat ang," tiin assistant coach hranpa bik neih a tum lo a, coaching staff siam ṭhat a tum thu a tarlang bawk.

United hian pahnihna niin season an khar a, Sir Alex Ferguson-a'n manager hna a chawlhsan hnua an thlensan leh ber ṭum a ni. Tun season-ah Mourinho hoten nomawi an la chawi lo a, May 19 zan dar 9:45 hian Chelsea nen Wembley Stadium-ah FA Cup final an khel ang.