Celtics an chak ,LeBron a nil

NBA Eastern Conference finals game 1-ah Boston Celtics chuan TD Garden-ah Pathianni zan khan mikhual Cleveland Cavaliers chu 108-83 in an sawp a, LeBron James chuan point 15 chauh a nei a. Game 2 hi Nilaini zing dar 6:00 hian Celtic home TD Garden-ah bawk an khel leh ang.

Celtics-in Cavs aṭanga an lakluh Kyrie Irving chhawr thei lo mah se player naupang rualin huaisen takin Cleveland an hmachhawn a, first quarter-ah 36-18 in hma an hruai a, bul an ṭan ṭhat hi an chakpuiah a ngaihtheih.

Kum 21 mi Jaylen Brown chuan point 23 neiin Celtics player zingah point a ngah ber a, Marcus Morris (21 pts) leh Al Hoford (20) ten point 20 nei tling ve vein Jayson Tatum chuan point 16 a nei pha bawk.

Marcus Morris chu LeBron chet theih loh chhan bera ngaih a ni a, inkhelh banah Celtics forward chuan, "Keimah chauh a ni lo a, team thawhrah a ni. Ka khelhpui te khan min thlawp ṭha a, team angin kan thawk ṭha a ni," tiin a sawi.

Cavaliers chhuanvawr James hian vawi 16 aṭangin vawi nga lutin point 15 a nei a, assists vawi kua leh rebound vawi sarih la mah se turnover vawi sarih a nei a, player naran tan record ṭha ni mah se LeBron tan chuan a ṭha lo.

James pawhin inkhelh banah Celtics game plan a fak a, amaherawhchu game 2-ah erawh 'nil' nawn a duh dawn lo a, Nilaini zing inkhel a hmuhnawm dawn. Tukin zing dar 6:30 hian Western Conference finals game 1-ah Houston Rockets leh Golden State Warriors te Toyota Center-ah an inkhel ang.