Salah a awm – buaina tur a awm lo e!

"A keah ball a awm chuan goal-ah a chantir zel ṭhin," tih te, "Salaaah, a goal leh ta," tih te chu Premier League-a commentator te ṭawngkam lar a ni a, a awm lo hran lo.

Pathianni zan khan Mohamed Salah hian Brighton & Hove Albion lakah Liverpool chu 4-0 a hnehna chanpuiin goal khat a khung a, Premier League season khata match 38 khelh a nih hnua goal 32 khung thei hmasa ber a ni–golden boot a dawng nghal.

Liverpool-in hnehna an chan avangin season tharah Premier League an khel dawn chiang a, Chelsea erawh Newcastle United lakah 3-0 a an tlawm avangin Europa League-ah an lungawi a ṭul a, Antonio Conte-a'n league-a Blues a kaihhruai hnuhnung ber a ni nghal a nih pawhin a mak lo ang.

Goal kua ngawt luhna inkhelah Tottenham Hotspur-an comeback a, an mikhual Leicester City chu 5-4 in an hneh–Spurs-in pathumna dinhmun an luah a, Liverpool chu palina an ni.

Hei hi a ni, Salah chu!
"Hei hi Salah chu a ni, Premier League Lalpa, Egyptian star, Arab mipui inchhuanna, lunghlu ṭha mi a siam a ke hmangin kan lawmna a thlen zel ṭhin. Arab mipui hlimna thlentu, I thiamna chu min pe la, i ropuina chu min temtir zel rawh," tih chu Arab football commentator lar Raouf BenKhelif ṭawngkam a ni a, hei hian Salah ropuina chiang takin a hrilhfiah.

Anfield-a inkhelah Salah hian minute 26-na lekah goal hmahruai a khung a, Sadio Mane-a'n mahni hmasial lo taka a siamsak erawh goalkeeper chauh hmachhawn chungin a khung lo–Reds tan Dejan Lovren-a'n goal khat a tauh lut a, Andrew Robertson leh Dominic Solanke ten Liverpool tana an goal hmasa ber an khung ve bawk.

Salah-a'n goal hmahruai a khung chiah khan Premier League-a match 38 chiah khelh a nih hnua goal 32 khung thei hmasa ber a ni a, Alan Shearer (Blackburn, 1995-96), Cristiano Ronaldo (Manchester United, 2007-08) leh Luis Suarez (Liverpool, 2013-14) ten goal 31 ṭheuh khunga record an lo siam tawh chu a khum.

Premier League-a match 42 khelh a nih laiin Shearer (Blackburn, 1994-95) leh Andy Cole ( Newcastle United, 1993-94) te chuan goal 34 an lo khung tawh a, minute 84-naa lakchhuah Salah hmelah lungawi lohna hmuh tur a awm–goal 34 khunga record zawng zawng thaichhiat a duh a ni!

Hriat loh vang
Salah-a'n record ropui zawk siam duh mah se minute 90 khelhtir a ni lo a, thutlukna siamtu Liverpool boss Jurgen Klopp chuan record lam a lo ngaihtuah loh vang a nih thu a sawi!

German coach chuan, "Salah record ka lo ngaihtuah miah lo a, ka lakchhuah hnuah khan Tottenham-in goal nga an khung tih ka hre ve chauh a, Harry Kane-a khung vek a ni ang tih a hlauhawm khawp mai! Salah-a'n season duhawm tak a hmang a, hma a la sawn zel dawn avangin goal te chu a la khung dawn chauh alawm," tiin a sawi.

Klopp chuan inkhel chungchang sawi nghalin, "Pressure sang tak nei chungin Champions League-a kan hmun kan tichiang a, ka lawm takzet a ni. Brighton lakah khan point khat hmuh a tawk a, mahse draw game khel tura plan siam hi ka thiam ve chi a ni lo. Hnehna chan tumin kan khel a, kha aia tam zawk kha goal khung thei kan ni. Mahse, Brighton hian season ṭha tak an hman avangin goal kan khung tam lutuk lo pawh kha a pawi chuang lo," a ti.

Brighton lakah hian James Milner chu squad-ah dah tel a ni lo a, Klopp chuan May 26 zana Champions League final khel turin a dam hman tur thu a sawi.

Antonio Gon-te/Rafa Beni-stay?

Chelsea-in Champions League khel turin chak an mamawh a, Liverpool an tlawm a ṭul tel bawk. Blues beisei angin Reds result a thleng lo a, an khelh danin beisei a phak lo lehzual. Magpies tan Dwight Gayle chuan minute 23-na lekah goal hmahruai a khung a, second half-ah Ayoze Perez chuan goal hnih a khung bawk.

Blues manager Conte dinhmun a him loa ngaih a ni a, Italian manager chuan, "Kum khat contract ka la nei a, he club tan hian ka rinawm," tiin a sawi thung–inkhel chungchang sawiin, "Tlawm kan phu a, kan ball chan apiang kan hloh a ni. vawiin result vanga CL khel lo tur erawh kan ni lo a, kan match hnuhnung pahnihah kan chance neih kan chhawr lo a ni.

"Vawiinah hian dem tur an awm a nih chuan coach hi dem tur ka ni a, ka naute ka fuih phur zo lo a ni," a ti–Conte-a'n May 19 FA Cup final-a Manchester United an hmachhawn hunah mangchhia thairehna remchang a nei ang.

Conte dinhmun a him loh laiin Newcastle hotute nen an inhmuh thiam loh avanga chhuak tur anga sawi Rafael Benitez chu Magpies fan-ten cham turin an ngen a, minute 90 chhung, "Cham rawh aw," tiin an zai rual. Spanish manager chuan, "Season tluana fan-te thlawpna hmutu tan chuan kan match tawp ber khelh dan hi a hlimawm a ni," a ti.

Goal surna
Minute lina leka Jamie Vardy goal chu Tottenham-in Kane goal hmangin minute sarihna lekah sut mah se, Leicester lamin Riyad Mahrez leh Kelechi Iheanacho hmangin an chhanglet.

Mualpho takin Spurs an tlawm dawn niin a lang hman, mahse Erik Lamela (2), Christian Fuchs (own goal) hmangin an chhanglet a, Vardy-a'n goal khat dang rawn khung leh zauh mah se Kane hmangin Spurs-in hma an hruai nawn a, an mualah 5-4 in an chak.

Kane-a'n tun season league-ah goal 30 a khung a, Premier League-a goal 30 a khung tlinna hmasa ber a ni–goal hnihin Salah a phak lo a, golden boot erawh a dawng ta lo.

Spurs manager Mauricio Pochettino chuan, "Pathumna nichunga season khar a, Champions League kan khel tur hi hnathawh ropui tak a ni," tiin a sawi.