Mizoram team-in medal pariat la

42 National Arm Wrestling Championship 2018 chu May 9-13 chhung khan Lucknow, Uttar Pradesh-ah neih a ni a, Mizoram aiawh a kal ten medal pariat an hlawh chhuak.

Inelnaah hian India ram state hrang hrang 23 an inlan a, Mizoram aṭang hian player 20 leh team official pathum an kal. He championship hi October 13-22 chhunga 40th World Armwrestling Championship, Antalaya Turkey-a neih tura India aiawh tur thlanna a ni dawn a, India Arm Wrestling Federation chuan an mi thlante an la tarlang rih lo thung.

Mizoram team hi manager Lalrivunga leh assistant manager Vanlalchhuanga ten an kaihruai. Lalrivunga chuan, "Tun hmain hlawhtlinna kan lo chang ve tawh ṭhin a, tun ṭum hi kan tih ṭhat ber ṭumte zinga mi a ni," tiin Vanglaini a hrilh.