Italian champion Juventus

Juventus chu a zawna a vawi sarih nan Serie A champion an ni leh ta. Turin club hian khualmualah AS Roma chu goal lut loin an inhnehtawk pui a, match 37 aṭanga point 92 hmuin match khat khelh tur la awmah team dang tan lehpelh theih an ni tawh lo.

Pathianni zan inkhel dangah pahnihna Napoli chuan Sampdoria 2-0 in luhchhuah thei mah se, league match khelh tur la awmah an chunga awm Juventus hi point liin an phak lo a ni.

Allegri ropuina
Massimiliano Alleg­ri-a nauten Nilaini zanah AC Milan hnehin Coppa Italia champion an ni tawh a, nomawi an chawina hmun Stadio Olimpico-ah bawk an mamawh zat point an hmuh theih avangin Bianconeri hi a vawi 34 nan Italian champion an ni thei.

Italian manager Alleg­ri kaihhruaina hnuaiah Old Lady hian tun hnai season li chhung chu Serie A leh Coppa Italia nomawi an chawi kawp vek thei a, Champions League final vawi hnih an khel thei bawk - hun rei lote chhungin sulhnu ropui leh hriatreng tawh tur a hnutchhiah der tawh.

An champion tih a chian hnuah Allegri chuan, "Juventus player zingah tuh hnaia Serie A nomawi vawi sarih chawi thei an awm, fak an phu takzet. A nihna takah chuan Coppa Italia chawi hnu lawka team ṭha hmachhawn zui hi a harsa duh hle, mahse hun pawimawhah chuan player fing leh tawnhriat ngah ten kan mamawh tawk an hria a ni," a ti.

Juventus hian Pathian­ni zan dar 9:30-ah Verona an mikhual dawn a, an league match hnuhnung berah hian nomawi an chawi ang. Allegri chuan ropui taka nomawi lawmna hun an hman tur thu a sawi tel nghal bawk.

Kum 50 mi Allegri hian Turin club tan season hnih daih contract a la nei a, heti chung hian manager thar zawng lai Arsenal nen sawi zawm mek a ni. Allegri chuan, "Juventus-ah hian chona hmachhawn tur a la awm reng a, club thuneitu lamin chhuak tura min tih ka ring lo, season tharah he hmunah hian ka awm zui ngei ka ring," tiin Turin chhuahsan tumna a neih loh thu a sawi.

Beisena thamral
April 22 khan Napoli chuan an mualah ngei champion lai Juventus hi 1-0 in an luhchhuah a, an inthlauhna chu point khat chiah a ni. Juve hian Inter Milan leh Roma te an la hmachhawn dawn avangin point an hloh ngei a rinawm a, Napoli hian hian 1990 hnua a vawi khat nan Serie A nomawi an chawi ngei dawn niin an ngai a, an pasalṭha ramchhuak hlawhtlingte hi an lo hmuak hial.

Amaherawhchu, an beisei ang ngawtin thil a kal thei bik lo. Fiorentina hmaah 3-0 in an tlawm, Juve an hneh ṭuma chakna goal khungtu defender Ka­lidou Koulibaly hnawh­chhuah a nih hnuah goal thum an chhuah a ni - season hun tam zawk hmahruaitu ni thei hi an mikhual Torino nen 2-2 a an inhnehtawk zui bawk.

Point ruk hmuh theih­na aṭanga point khat chiah an hmuh avangin an ban phak maia nomawi awm tawh chu dah hlatin a awm a, Sampdoria an hneh hnua point 88 an neih tawh hi an club record thar ni mah se ropui­na rama hruai lut turin a tawk zo ta chuang lo.