India U16 an champion

Pathianni zan khan India U16 chuan Sport Chain Cup-ah Tajikistan 4-1 in an hneh a, an champion.

Serbia-a inelna neihah hian Mizo rawlthar pali telna India team hian an match hmasa berah Jordan chu 2-0 in an hneh a, match hnihnaah Serbia nen goal awm loin an inhnehtawk. Match hnuhnung berah champion turin chak an mamawh a, India team hian chiang takin hnehna an chang.

Tajikistan an hneh ṭum hian India tan Givson-a'n goal hmahruai a khung a, Armed Veng rawlthar Lalchhanhima Sailo chuan goal hnihna a khung a, Sabash leh Rohit ten an khung belh bawk. Lunglei Ramthar Veng goalkeeper Lalbiak­hlua Jongte chu best keeper-ah thlan a ni a. Mizo pahnih dang Lengpui rawlthar Lalrokima leh Serchhip rawlthar Eric Remruatpuia te chu bench aṭangin an tlan lut ve bawk.

Nimin khan India team hian Serbia an chhuahsan a, September thlaa neih tur AFC U16 Championship atana inpuahchahna chu Kolkata-ah an nei chhunzawm dawn a ni.