Arsenal tel lo hringnun a harsa dawn - Wenger

Arsene Wenger chuan, "A lungngaih thlak" tiin Arsenal manager a nih laia a match hnuhnung ber an khelh zawh hnuah a sawi a, match 1,235 a enkawl tawh Gunners tel loa hringnun hman chhoh chu harsa dawn hlea a hriat thu a sawi tel bawk.

Pathianni zan khan John Smith's Stadium-ah Wenger-a'n a naute a hruai lut a, parukna an ni dawn tih a chian tawh bakah an kingpui Huddersfield chu an him tih a chian tawh avangin inkhel boruak a nung hran lo.

Amaherawhchu, Wenger ngainatute tan chuan inkhel pawimawh leh hriatreng tawh tur a ni thung. Chawlhlawk hma deuha striker Pierre-Emerick Aubameyang goal hmangin 1-0 in hnehna an chang a, hnehna chang chung ngeiin a hmangaih a thlah.

French manager Wenger-a'n a enkawl chinah Arsenal hi legaue-a an hniam ber ṭum a ni a, season tharah Europa League an khel ang; chutih rualin kum 2018 chhung bika khualmuala hnehna an channa hmasa ber a nih avangin a hmawr a bawk chhe hran lo.

Minute 22
Kum 68 mi Wenger-a'n season 22 chung Arsenal a enkawl tling ta a, season tharah chuan a hna hi a kalsan dawn. A hna thawh tawh hriatreng nen Huddersfield nen an inhmachhawn ṭum hian team pahnih fan-te chuan minute 22-naah ding chungin zahna an lantir a, Gunners ṭantuten an manager chhuak tur thlahna hla an sa.

Khelmual chungah thlawhtheihna hmangin "MERCI ARSENE We'll Miss You Too" tih tarlan a ni a. Emirates Stadium-a Wenger-a an thlah ṭum khan French manager chuan Arsenal leh a ṭantute chu a ngaih thu tur a sawi a, Gunners ṭantute pawhin langsar takin an pu chhuak mai tur chu an ngaih tur thu an chhanglet.

Premier League nomawi pathum leh FA Cup pasarih chawi pui a, hriat reng tur 'The Invincibles' din saktu manager hi ropui takin a thlahna hun an hmang.

Wenger chuan, "Club pakhat match 1,235 enkawl hnua chuahsan chu awmdan pawh thiam a harsa hle. Mawi taka football khelh chunga hnehna chan ngei hi nuam ka tiin hnehna kan chang hi kan lawm tur a ni, chutih rualin Huddersfield pawh an him avangin kan lawm tawn hle.

"Zep tur a awm lo, a tawp han thlen chiah chuan ka lungngai takzet a ni. A tir aṭanga tawp thlengin ka chunga fans an ṭha em em a, hun kal zel turah pawh hetiang hian an tih zel ka beisei. Player leh coaching staff-te duhsakna ka hlan a," a ti. 'Kei chu Arsenal fan rinawm ka ni reng ang' tiin a thu sawi a tlip a ni.

Wenger hian kum 22 chhungin Arsenal hi inelna hrang hrangah vawi 707 hnehna a chan­pui a, vawi 280 chu an khingpuite nen in­hneh­tawkin, ṭum 248 dang chu an chak lo thung.

Terriers an lawm
Arsenal lakah chak lo mah se Huddersfield an lawm tho! Terriers hian 1972 hnua a vawi khat nan English club inelna sang ber an khel a, an mumang ram hi season khat lekah a thamral bik lo - season tharah Premier League an khel zui dawn, an match hnuhnung ber an khelh zawh hnuah lawm avangin khelmualah fans an tlan lut.

David Wagner-a nau te hian dinhmun khirhkhan taka an din laiin champion Manchester City leh season hmasa champion Chelsea te an inhnehtawk pui thei a, fixture hautak ber tura ngaih an paltlang theih miau avangin EPL-a cham chhunzawm hi an phu.

Huddersfield manager David Wagner chuan, "Player bakah club tana hna thawktu zawng zawng ten an hna ṭha takin an thawk vek. Club tan hian season hmasa lama kan inpet kai kha chanchin lawmawm a ni a, kan cham zui tur hi hmasawnna ropui a ni. Fans ho lawm avanga khelmual chhung an lut kha a mak lo," a ti.