Champion City = Century

Manchester City chuan Pre­mier League history-a point 100 hmu tling hmasa ber ni turin Pathianni zan khan Southampton chu St Mary's Stadium-ah 1-0 in an hneh a, goal awmchhun hi injury time minute linaa substitute Gabriel Jesus-a khung a ni.

Pep Guardiola-a'n league nomawi an chawi hnuah pawh record siam an duh thu a sawi nawn a, Brazilian forward goal vanga City team pumpui lawm dan thlirin Spanish manager hi a ṭawng satliah lo tih a lang.

Jesus-a'n goal a khung chiah hian kawr phelhin a goal khung a lawm a, Sergio Aguero-a'n kum 2012-a champion-na goal a khung ang mai kha a ni a. Mual sira awm Pep-a leh player dangte pawhin an goal khung hi nasa takin an lawm bawk a, April 15-a champion nemngheh tawh tih reng an hriat loh.

Century!
Premier League season khatah hian point 114 a hmuh theih a, point 100 hmutu Man City hian point 14 chiah an hloh. Pahnihnaa awm Manchester United chuan point 81 an hmu a, vanneih ṭumah chuan champion pui tham ni mah se an hmelma City an phak lohna chu point 19 lawih a tling pha.

Spanish manager Pep Guar­diola chuan, "Engtin nge ka sawi ang, point 100! Kan mualah point 50, khualmualah point 50 kan hmu a ni a, a ropui a danglam hle a ni. Engtik hunah emaw chuan kan record hi an la khum ang a, amaherawhchu a harsa khawp ang," tiin an thlen chin chu lawmawm a tih thu a sawi.

City hian 2004-05 season-a Jose Mourinho hoa Chelsea-in season khata point 95 an siam record an khum tawh chu duh tawk loin century hial an thleng.

A chiang ta
Pathianni zan khan tun season Premier League chu khelh zawh a ni ta a, Southampton-in Man City hneh lo mah se Swansea-in Stoke City an hneh loh ve bawk avangin Premier League khel zel turin an him.

English football league sang ber aṭangin Swansea City bakah Stoke City leh West Bromwich Albion te chu an relegate.

Champions League khel tur pawh a hriat a, Manchester City bakah Manchester United, Tottenham Hotspur leh Liverpool ten an khel dawn.

Chelsea-in nomawi an hum­him lo a, season tharah Champions League an khel dawn lo. Blues hian Arsenal nen Europa League an khel dawn a, FA Cup final-ah United leh Chelsea te an inkhelh dawn avangin pasarihna Burnley pawhin Europa League an khel ang.

City leh Record
Manchester City hian Pep Guardiola hnuaiah nomawi an chawi satliah lo a, Premier League record awm sa 11 zet an siam. Champion chiang ber : Man United chuan 1999-2000 season khan Arsenal lakah point 18-a falin champion chiang ber record an siam a, tun ṭumah hian City hi an hmelma United ai hian point 19 in an hmu tam zawk.

Champion nemnghet hma : United-in 2000-01 season han match nga khelh hmabak la awmin nomawi an chawi a, tun ṭumah hian United-in mak taka West Brom an hneh loh avangin Pep Guardiola hote hi match nga khelh hmabakah tho an champion.

Point hmu hnem ber : City-in point 100 an hmu a, 2004-05 season-a Chelsea point hmuh zat point 95 chu point nga zetin an khum a, century an siam bawk. Goal khung hnem ber : City hian goal 106 khungin season an khar a, 2009-10 season-a Chelsea-in Carlo Ancelotti hnuaia goal 103 an khung chu an khum.

Chak hnem ber : Season liam ta khan Antonio Conte hoin Chelsea chu match 30-ah an chak a, Pep Guardiola hote hian Saints an hneh chiah hian match 32-ah hnehna an chang. Chak zawn rei ber : Arsenal (2001-02) leh Chelsea (2016-17) te match 13 chhung an chak zawn a, he record hi City hian December 10 khan Manchester Derby-ah United hnehin an nihrual a, hnehna chang chhunzawmin match 18 chhung a zawnin an chak.
Khualmuala chak hnem ber : Mourinho kaihhruai Chelsea chuan 2004-05 season khan khualmualah vawi 15 an chak a, City-in Saints Mary's Stadium-a hnehna an chan chiah khan khualmuala vawi 16 an chakna chiah a ni.

Goal difference Ṭha ber : Chelsea-in 2009-10 season-a nomawi an chawi khan an goal difference chu +71 a ni a, tun ṭumah hian City goal difference chu +79 daih a ni. Chawhruala ball chang tam ber : Ball chan tam zawng hi 2010-11 season aṭang­in an chhinchhiah ṭan a, Pep Guardiola hote season liam ta khan chawhrualin 64 percent neiin record an siam a, kumah 71 percent neiin an record hi an khum lehnghal.

Pass tam ber : Ball chan tam zawng ang thoin pass tam ber hi 2010-11 season aṭanga en ṭan a ni a, Guardiola-a season khat­naah a hoten 20,506 pass dik a nei a, an pass dik percentage hi 84 a ni a, tun
ṭumah hian vawi 28,242 zet pass dik an nei a ni.

Manager of the month ni zawn rei ber : Guardiola hi nikum November thla khan a zawna a vawi thum manager of the month-ah thlan a ni a, Conte record nihrual chiahin December-ah ni leh chiahin record thar a siam.