TUIRIAL BIAL AṭangIN THIL THAR KAN HMU ANG EM?

Tuirial bial By Election kan hmachhawn mekah chuan boruak chi hrang hrang kan han hre chho zelin Party hrang hrangte chuan campaign kickoff nei tawh hlawmin an theihtawp an chhuah a. Social media lamah pawh helam thu leh hla hriat tur a awm reng bawk a, Party-a hruaitu pawimawh tak takte thusawi ngei pawhin beng a verh ta viau ṭan mai.

A bik takin MNF Party President leh kan Chief Minister ni bawk Pu Zoram­thanga ṭawngkam chuan sawizui a hlawh hle mai a, Tuirial bial mipuite chu eptu lam an thlan tlin chuan ‘Kan tih fuh loh pawl tak’ an la tih ngei ngei tur thu a sawi chuan Party dang ngaimawh a hlawh hle nia hriat a ni.

Kan CM zahawm tak ṭawngkam hi ngaihmawh­awm tak pawh a nih theihna lai a awm rualin kan Zoram Politics system dik tawh loh avang hian amah ngau ngau dem erawh chu a fuh chiah lo mai thei a. A chhan chu Party dangte pawh hian hetiang hi an lo kalpui tawh dan a ni hlawmin Pu Hawla phei chuan ‘ka chhungte pawh nimahsela kan Party mi leh sa an nih loh chuan kan In aṭangin nupui pasal an nei thei lo ang’ tiin a sawi hial em kha... He ṭawngkam hi dik chiah lo mahsela helam hawi deuh chu a ni ngei awm e.

Hetiang tak hian Chief Minister nih tlingte ngei pawhin tawngkam an hmang duh a ni a, chuvangin tuna kan CM tawngkam pakhat hi thil thar a ni lem lo. Party system kan tih hi rual u te tawngkam leh lehkhabu aṭanga kan hmuh danin Mizo Union hunlai kha chuan a hluar vak lo ni awm tak a niin kum 1972-a MLA kan nei tan chhoh aṭang khan lo hluar chho ni taa hriat a ni.

Vawiin thleng hian hetiang taka tawngkam hi chu hriat tur tam lo mahsela a taka kan kalphung a nih miau si avangin leh nghawng tha lo tak tak a nei si avang hian kum 2018 khan pawl thar lo piangin ZPM (Zoram People’s Movement) hmingin zoram dung leh vanga chi an rawn tuh tan a, mipui ngaihzawn pawh an hlawh viaua hriat a ni. ZPM te hian 'kalphung thar' chu an auhla ber niin anmahni ngei pawh chuan sorkarna fawng an chelh hunah chuan tumah thliar bik awm loin mipui tana rawngbawlna neih an tum a, Val Upa Council awpna hnuaiah ke an penin Zoram Politics-ah hmel thar chhuah an tum ruh hle a, ilo thlir zel phawt ila.

Tuna Tuirial By Election kan hmachhawn mekah ngei pawh hian kan hriat theuh angin Political Party palite chuan Official candidate siamin; MNF Party Official candidate chu K. Laldawngliana a ni a, Congress Party-in Chalrosanga Ralte ni bawkin ZPM Party candidate pawh K. Laltlanmawia niin BJP pawhin October 4, 2021 khan an Official candidate puangin K. Laldinthara a ni bawk a. An zavai mai hian kum lamah pawh an inrual khat hlawmin an la thalai hlawm viau bawk a ni. A tu ber pawh hi tling sela bial mipuite tana mi tangkai tak vek tur niin a hriat a, bial vilna kawngah pawh an chak viau ngeiin a rinawm.

Chutih lai erawh chuan pawi­mawh ta ber zawk chu Tuirial bial aṭang hian Thil thar kan hmu ang em? Tih hi a ni a, sawi loh theih loh chu Andrew khan he bialah hian sulhnu tam taka lo nei hmanin hmachhawp lak mek pawh a nei nual bawk a, a hmachhawpte hi Party dang te chuan chhunzawm kher ngai ti lo an awm theiin hma thar lak tum zawk pawh an ni mai thei a. Chu lam erawh keini sawi phak a ni chiah lem loh avangin sawizui thui lo ila, anmahni thu thu a ni zawk a, bial mipuite ngen dan leh beisei dan pawh a ni thei bawk ang. ZPM candidate tan erawh chhunzawm ngei ngei a ngai thung turah ngai ila, bial mipuite’n amah an beisei dan pawh a ni ngeiin a rinawm.

MLA tupawh mai hi Party hruaitute thu thua kal hi an ni deuh vek mai a, a nih dan tur pawh a nih laiin an ṭhahnemngaihna leh bial tana an inpekna zawng zawngte pawh Party hruaitu lamin an up bo sak thung thei bawk si. Tunah pawh hei kan hriat theuh angin Lunglei District Hospital-a Rt-PCR khawl dah chungchangah ngei pawh bialtu MLA te chuan bial mipuite thlavang hauhna lam ṭawngkam pawh an nei hlei thei lo a, Party hruaitute thu thua an awm zawk avangin tun hi kan thleng a nih hi. Anmahni ngei pawh hian hetiang hi hrehawm an ti viau mai thei a, inthlan leh hunah pawh tlak phahna tham a ni hial awm e.

High Court-a PIL thehluh hial a ngaih phah a, tunah an theihtawpin hma han la leh pawh nisela a nih tur ang chu a nih vek tawh thoa ngai an awm ngei si ang. Hei vang hian Tuirial bialah ngei pawh kan MLA thlanchhuah thar tur hi tunge a nih kan la hriat hma hauh aṭang hian lo sawi lawk hi a ṭha awm e. Party hruaitute kawhkual dan ang anga awm mai tur MLA nge kan thlanchhuah dawn a, bial mipuite mamawhna ang taka ṭhahnemngai taka bial tana thawk tur tih pawhin bukna kan siam thei bawk ang. Sorkar kan hrawn tawhte anga Party Politics ang bawk a, rul vun inlip an sawi ang maia thinlung chhungril danglamna awm chuang lo a pawnlam chauha hmel thar neih leh ṭhin hi kan duh tawh loh a, kan hnawl ngam a ngai takzet tawh a ni.

A thim zawnga kan sawi ni lem lo sela, Mizote anga kristian lemchang thiam hi khawvel hmun dangah hian an awm ve ang em tih tur hi a ni a. Khawvela President rethei ber tia an sawi thin chu Jose Mujica niin Uruguay President a ni a, amah chu ringlo mi (atheism) mah nisela a thlabi hlawh lak 90% vel chu mirethei zawkte tan a sem ziah ṭhin a, ringtu zawkte hian kan tluk lo hle mai.

Thuneihna hmansual kawng­ahte rorelna dik lo lakahte leh hlemhletnaahte hian kan Kristianna hian hmun pawimawh chang hram hram thei ṭhin sela chuan heti tak hian kan ram pawh hi hmasawnna kawnga chak lo tur chu a ni kher lo ang maw le. Tuna Tuirial bial By Election aṭang hian zoram Politics chhe tawh tak siamtha turin hmel thar rawn chhuak thei sela, Zoram pum chhun eng thei tur leh Party Politics aia bial mipuite zawng zawngte tana ram rawngbawltu tur leh bial mipuite tana ṭha zawk turah chuan MLA aṭang pawha bang ngam tur hi bial pawn aṭanga Tlumtea thlir taka kan lo thlir a niin Tuirial bial aṭang hian thil thar kan hmu ang em kan lo ti a ni.

- Mahmuaka Chhakchhuak