MPL season thum khelh tawh aṭanga Mizoram Premier League Season 4 thlirna

Mizoram chhunga football league sang ber Mizoram Premier League Season 4 khelh mekah Aizawl FC-in point 18 hmuin hmahruaitu an ni a, an champion zui ang em tih chiang lo mah se semifinal an lut chiang tawhah a ngaih theih.

Boruak siamtu Semifinal?

MPL1-ah team-te an intluk tawk a, Round 14 thlengin inkhel a ngaihnawm. MPL2-ah final awm lo se Chanmari FC awlsam takin an champion ang, amaherawhchu a sang pahnihin final an khelh dawn avangin Round 14-a final luh inchuh boruak a sang hle. MPL3-ah erawh Aizawl FC leh Chanmari FC an filawr deuh avangin league stage boruak tawp lam a sang tawk lo.

MPL4-ah a sang paliin semifinal an khelh dawn avangin table mawngphaha awm Mizoram Police pawhin chhiarkawp dan ringawt loin champion an la beisei thei dawn a, hei hian season tawp thlengin inkhel a ti ngaihnawm ang.

Zirchianna
* MPL3 champion Aizawl FC kha Phase 1 zawha hmahruaitu an ni a, Phase 2 zawhah hmahruaitu an ni. MPL1 leh MPL2-ah erawh Phase 1 zawha hmahruaitu Mizoram Police chu Phase 2 zawhah pahnihnaah leh palinaah an awm thung. An point inthlauh dan aṭanga thlirin semifinal hmunruak pakhat hi chu Aizawl FC kutah a dah theih tawh.

* MPL1 leh MPL3-ah Phase 1 zawha pariatna FC RS Annexe leh Lunglei FC te an relegate zui a, MPL2 Phase 1 zawha pariatna Reitlang erawh Phase 2 zawhah pasarihnaah awmin Relegation Playoff hmangin an inhamtang hram. Hei vang hian MPL4-a pariatna ni mek Mizoram Police-in transfer an hman ṭhat loh chuan tla thei dinhmunah an ding tih a chiang hle.

* MPL season thum khelh tawh aṭanga thlir chuan Phase 1 zawha a sang pali hi Phase 2 zawhah a intlak danglam meuh lo.

* MPL1-ah Police, Dinthar, Chanmari leh Luangmual te chu Phase 1 zawhah a sang pali an ni a, Phase 2 zawhah Luangmual aiah FC Kulikawn-in palina an rawn hauh.

* MPL2-ah Police, Luangmual, Chanmari leh Dinthar te chu Phase 1 leh Phase 2 zawhah a sang pali zingah an inhlangkai ve ve.

* MPL3-ah Aizawl FC, Chanmari FC, Police leh Dinthar FC te chu Phase 1 zawha point hmu sang pali an ni a, Phase 2 zawhah Dinthar aiah Chanmari West chu palinaah an rawn lut chho thung.

* MPL4-ah Aizawl FC (18 Pts), Chanmari FC (13), Dinthar FC (11) leh Chanmari West FC (10) te hi point hmu sang pali an ni a, a hnuai lam team pali Bethlehem VT (9), Luangmual (8), Zo United (5) leh Mizoram Police (4) ten an hlat lo. Chetsual khauh chuan palinaa awm Chanmari West hi match hnih leka pariatnaa awm Police-in an umpha thei.

* MPL4 tawp dan tur tidanglam tur hian hun kal tawh statistics aiin transfer hawn meka player lakluh danin nghawng a nei lian zawk ang.


Share this Post

Login to comment
No Comments