Ramhlun Venglai an thiam ber – Aw Ramhlun, ka ram ropui!
LBS SUZUKI Inter Branch YMA Cricket Tournament vawi 10-na final chu Inrinni khan khelh a ni a, Ramhlun Venglai bawk an champion leh ta. RVL hian an vawi li champion-na ni turin champion tum tak Durtlang chu wicket thumin an hneh.
Durtlang captain Zomuankima'n, "Ramhlun Venglai hneh chunga champion tluka châk kan nei lo," tiin inkhelh hmain sawi mah se khelmualah an duhna leh châkna an ti lang thei lo a, a vawi thum nan final-ah Ramhlun Venglai an ngam lo.
Duhthlanna dik
Suaka Memorial Cricket Ground, Sihhmuia inkhelah ṭhumvawra vannei zawk Ramhlun Venglai lamin khelmual dinhmun thlirin thiam takin vawm hmasak an thlang a, boruak hnawm leh ruah tlain a puih tel avangin an vawm ṭha hle.
Durtlang inchhuanna K. Vanlalruata'n hun pawimawhah a theihna a pholang thei lo a, ball 13 a hmachhawnah run kua chiah siamin a out. Mapuia Cricket League khelh zawh taka player manto ber Henry Lalsangzuala pawhin chhuan tur a nei bik lo a, run li chiah a siam–Lalhruaizela chu run pawh siam loin a out thung.
Durtlang mualpho lutuk tur khuh nan Zothanzuala (29 runs) leh Lalhriatrenga (28) an inlar a, Durtlangin over 20-ah run 100 siamin wicket sarih an hloh. RVL tan F. Lalmuanzuala'n wicket hnih a la a, Malsawmdinpuia, Joseph Lalthankhuma, Joel Lalhmangaiha leh Vanrotlinga ten wicket khat ṭheuh lain run an pe tlem viau bawk.
A tawpah Ramhlun
Ramhlun Venglaiin run 101 siam turin ball 120 an nei a, huphurhawm niin a lang lo. Mahse, rawlthar rual nena khel Ramhlun Venglaiin an bat ṭan tirhin boruak sang an zo lo a, captain Malsawmdinpuia (15 runs) tih loh an top 5 batsman zingah run nga siam tling an awm lo a, run 37 an siam tihin wicket ruk an hloh tawh!
Beiseina nei tlem tawh nia ngaih Durtlang beiseina a nung thar a, mahse an hlim chhung erawh a rei lo. RVL ṭantura kalkhawmte thin phu a ran lai takin tun inelnaa che ṭha tak Joseph Lalthankhuma a inlar a, run 32 ngawt rawn vaw chhuakin boruak sang karah a ṭhiante a thlamuan.
RVL tan F. Vanlalmuanzuala'n champion ngei an duh tih pholangin run 37 ngawt rawn vaw chhuakin a tawp thleng a dam bawk a, RVL hian over 17.2-ah wicket sarih hlohin an target an umpha ta a ni.