Cricket thiam ber veng nih inchuh Ramhlun Venglai nge Durtlang sang dawn?

LBS Suzuki Inter Branch YMA Cricket Tournament final chu vawiinah khelh a ni dawn a, chawhma dar 11:30 hian Suaka Memorial Cricket Ground, Sihhmuiah Ramhlun Venglai leh Durtlangin a thiam zawk nih an inchuh ang.

Cricket thiam veng tia hriat lar Ramhlun Venglai leh Durtlang hi kum 2006 leh 2016 khan final-ah an lo intawng tawh a, Ramhlun Venglaiin hnehna an chang ve ve - Durtlangin kuminah phuba lakna remchang an nei dawn a, chhawr ngei an duh.

RVL hneh chak
Durtlang captain Zomuankima chuan, "RVL hi final-ah vawi hnih kan ngam lo tawh a, anni ngei hneha champion tluka chak kan nei lo," a ti a, hei hian inkhel boruak tur thui takin a hrilhfiah.

Batsman hi Durtlang inchhuanna a ni a, K. Vanlalruata, Lalhruaizela leh Henry Lalsangzuala te an nei. CYMA cricket hnuhnung bera Man of the Series leh Best Batsman atana thlan K. Ruata hi RVL tan ven uluk tur a ni - tun season 1st Division leh MCL-ah Chhinga Veng a champion pui a, a lungthu kim nan YMA lam a hawi ang - tun inelnaa century siam thei awmchhun a ni mek.

Naupang rual
Ramhlun Venglaiin naupang rual chhawr chungin inrintawkna nen tournament an hmachhawn a, bowling hi an inchhuanna a ni. Captain Malsawmdinpuia chuan, "Player naupang rual ni mah ila senior player-ten min uap ṭha a, kan veng YMA-in min thlawp ṭhat bawk avangin a vawi thum nan champion kan tum a, kan veng mipui pawh an tam leh khawp ang," a ti.

RVL hian Mizoram Under 19/17 players rual kawlin Joseph Lalthankhuma, Lalṭhakima, Lalchhuanliana leh Malsawmdinpuia te hi veng dang chil ti put khawpa thiam an ni.