Group of death: Liverpool mualah AC Milan

Champions League draw neih a nih ruala group stage-a ngaihven hlawh ber chu group B a ni a, Liverpool, AC Milan, Atletico Madrid leh FC Porto an awm ho avangin a awm lo hran lo.

Zanin dar 12:30-ah tun season Champions League-a 'group of death' an inlan dawn a, football ngaina inti tan chuan men rei zan a ni - Liverpool mualah AC Milan an leng dawn.

Premier League match li an khelh tawhah Liverpool an la tlawm lo a, Jurgen Klopp-a naute hi an ṭhat dan berin an khel leh tawh. Chutihrual chuan Serie A match thum khelh tawhah AC Milan an la chak vek bawk a, zanin inkhel a hmuhnawm loh ring suh.

Group B inkhel dangah zan dar 12:30 vek hian Atletico Madrid chuan FC Porto an mikhual dawn a, league match li an khelh tawhah Atletico Madrid an la tlawm lo a, league match ngaah Porto an la tlawm bik lo.

Liverpool an ṭha
Season hmasaah hliam vangin Liverpool an talbuai a, Champions League an khel pha ṭawk - hei vang hian tun season-ah pawh football expert tam takin an dah sang lo a, Premier League-ah pawh champion rinkai an ni phak lo.

Mahse, tun season-ah Liverpool an dam kim a, an danglam tawh tih an khelh dan hmangin an lantir a, mi tam takin an ngaihdan an sawh sawn leh ṭan tawh - league match liah vawi thum chakin vawi khat draw an nei a, goal kua an khung a, an lamah goal khat chiah a lut.

He thu buatsaih a nih lai hian Roberto Firmino dinhmun la chiang lo mah se Leeds United laka Mohamed Salah, Diogo Jota leh Sadio Mane inkawp hmu chuan tlarhmaa Liverpool ngaihtuahawm lohzia an hmu ang.

Rawlthar duhawm Harvey Elliott inhliam mah se Fabinho, Jordan Henderson leh Thiago an inkawp theih dawn avangin midfield-ah manganna tur a awm lo a, tlarhnungah Alisson, Trent Alexander-Arnold, Virgil van Dijk, Joel Matip leh Andy Robertson an awm chuan Liverpool fans thla a muang ṭhin.

Hmanah chuan...
Champions League chanchinah Liverpool leh AC Milan hming a langsar a, kum 2005 final-a an intawn phei chu football chanchina sawi reng tawh tur zinga mi a ni a, Steven Gerrard leh a nauten khatihlaia star rual awmna AC Milan laka comeback ropui an lantir dan kha ngaihnawm a tling.

Milan fan-te erawh chuan 2007 final-a Liverpool an hneh kha sawi nuam an ti zawk ang. Mahse, khami hnuah khan club pahnih an reh vang vang a, Liverpool-in 2018-a final an khelh hnuah 2019-ah nomawi an rawn chawi a, European club hmuhnawm pawl an ni leh tawh.

AC Milan erawh kum 2007 hnuah an reh tlawk tlawk a, champion chu sawi loh, tun season hi kum 2013 hnua Champions League an khelh leh hmasak ber tur a ni - an match hmasa bera Liverpool nen an intawng tur hi tam tak chu an lung a leng ang.

Thawnthu erawh a danglam tawh - AC Milan-in 'star' tia sawi tur player an nei tlem tawh zawk a, rin hlawh lo zawk an ni tawh. Anfield-a hnehna chan a awlsam lo ang.

Klopp-a nuih a za!
Liverpool-in group-a an awmpui tur an hriat khan Reds manager Jurgen Klopp chuan a nuih zat thu a sawi. German coach chuan, "Group B-a kan awmpui turte ka hriat rual khan ka nui a, a nihna takah chuan ring takin ka nui - a harsa em a ni," a ti a, a nuih chhan chu an elpui turte ṭhat lutuk vang a nih thu a sawi!

Milan hian league match thum an khelhah point kua neiin goal sarih an khung tawh a, an lamah goal khat chiah a lut - tlarhnung a phui a, goal khung an harsat lo tihna a ni a, Liverpool tan a awlsam dawn lo.

Italian club tana lawmna turin rei tak hliam vanga a chawlh hnuah Zlatan Ibrahimovic a lo kir leh tawh a, a lo kir lehna inkhelah Lazio hmachhawnin goal a khung nghal. October 3-ah kum 40 tling tawh dawn mah se season hmasa khan match 27-ah goal 17 a la khung a, a la tar lo.

Covid-19 vanga a chawlh reng hnuah Olivier Giroud a dam leh tawh bawk a, Arsenal striker hlui hian match hnih a khelhah goal hnih a khung leh tawh tih hriat a ṭha. Tiemoue Bakayoko erawh Lazio lakah a inhliam a, he thu buatsaih a nih lai hian Liverpool a hmachhawn theih dawn leh dawn loh a hriat theih rih loh.

Atletico an dam
Kartawp league match inkhelah Atletico Madrid an vannei a, Espanyol khelmualah hun pek belh minute kuanaa Thomas Lemar-a goal hmangin point an hlawh chhuak hram.

Barcelona aṭanga a kir hnuah Antoine Griezmann-a'n Espanyol lakah a match hmasa ber khel mah se beisei a phak lo a, Champions League-a Luis Suarez nena an inkawp tur mitthla hian en an châkawm hle.

Atletico player zingah hrem vangin Stefan Savic a inlan thei dawn lo tih loh chu harsatna a awm lo a, Espanyol lakah bench aṭanga Renan Lodi, Matheus Cunha, Joao Felix, Geoffrey Kondogbia leh Thomas Lemar te ho an luhtir theih avangin an ngaihtuahawm lo.

Porto-in league match ngaah tlawm la nei lo mah se vawi hnih draw result an nei a, an match hnuhnung berah Sporting Lisbon an inhnehtawkpui bawk avangin insiamṭhat an mamawh - Atletico laka insiamṭhat erawh a harsa mai thei.

Mumang neih hun chu zan mutnaah a ni a, kan harh lai chuan kan mumangte tihlawhtling turin theihtawp kan chhuah tur a ni. - Stefano Pioli, AC Milan boss