Number 7 ha tur Ronaldo

Cristiano Ronaldo hian Manchester United jersey number 7 a ha dawn a, season liam taa jersey number 7 hatu Edinson Cavani-a'n jersey number 21 a ha thung dawn. Man United number 7 hi club legend George Best, Bryan Robson, Eric Cantona leh David Beckham ten an lo ha tawh ṭhin a, heng player ropuite ai hian Ronaldo-a number 7 hi a ropui zawk.

August 16, 2003 khan Sir Alex Ferguson-a'n kum 18 mi Ronaldo chu Bolton Wanderers nen an inkhelh ṭumin second half-ah a luhtir a, Nicky Butt a thlak. Khawvelin Ronaldo thiamzia a hmu a, hahipin an fak. Sir Alex leh Man United tana a khelhpuite chuan Sporting Lisbon nen friendly match an khelh ṭumin a thiamzia an hre tawh a, mak an ti tawh lo.

November 25, 2005-a thi ta George Best pawhin United rawlthar Ronaldo hi a fak hle. Best chuan, "Player-in club tana an match hmasa ber an khelhah chuan Ronaldo hian min la ti phur ber. A hmunah khan ka inkhelhpui ṭhinten an en a, keimah nen min khaikhin. 'George Best thar' tia hming pek hi an nei nual tawh a, tun ṭumah erawh a vawi khat nan ka lawm. A ke pahnihin ball a khawih thei a, player bum a harsat lo a, ṭha takin a cross thei a ni," tiin a fak a, a sawi sual lo hle.

United 7 hatute
Ronaldo faktu United legend Best hi jersey number 7 larpui hmasa a ni a, Northern Irish footballer khan ball a thiam bakah a pet goal thei bawk. Matt Busby hoa United-in kum 1968-a European Cup an champion khan Best hian final-ah Benfica lakah goal ropui a khung a, hnehna an channa chhan pakhat a ni.

Best hi a hmel ṭhat avangin khelmual pawnah pawh a lar a, 'the fifth Beatle' tiin hming lem an pe. Khawvela player ropui ber anga mi tam takin an chhal Pele pawhin, "George Best hi khawvela player ropui ber a ni," tiin a sawi tawh. Chutihrualin Pele hian a ngaihdan dik tak sawi loin a thiamzia uar taka a sawinaah a ngaih theih.

Brazil legend Pele hian, "Lionel Messi chungah Cristiano Ronaldo a awm a, khawvela ṭha ber chu keimah hi a ni," tiin kum 2020 khan a sawi leh bawk a, amah hi ṭha a inti ber. Chutihrualin Best hi a thiam tih erawh a chiang a, Cristiano Ronaldo ṭhatzia a hriat theih bawk.

Bryan Robson hi Manchester United tan legend a ni a, a hun tawp lamah Premier League nomawi pahnih a chawipui. A ropuizia tichiangtu chu David Beckham-a'n a naupan lai aṭanga a entawn a ni a, Robson ang bawkin Beckham-a'n number 7 a larpui. Ball pet thiam hmingthang Beckham hi a hmelṭhat tel avangin khawvel huapah United number 7 a ti lar hle.

Chutihrualin Eric Cantona sawi hmaih a thiang lo a, French forward-in a jersey nghawng an ti chho ṭhinte chu a larpui hle. '1966 hi English football tan kum ṭha a ni, Eric-a pian kum a nih avangin' tiin an sawi ṭhin a, hemi kum hi England-in World Cup an champion ṭum a nih ve chiah avangin Manchester United tana Eric Cantona ropuizia a sawifiah chiang hle.

Number 7 leh Anchhia
Manchester United-in Cristiano Ronaldo chhuah hnuah number 7 hi player hrang hrang hnenah an hlan chhawng a, Liverpool legend Michael Owen meuh pawhin a hlawhtlinpui lo.

Owen hian mak takin Reds hmelma United hi kum 2009 khan a zawm a, season thum chhungin league-ah goal nga chauh a khung. Chutirhualin Manchester Derby-ah Owen hian September 2009 khan goal hlu bik a khung a, United ṭantuten he goal hi an hre reng ang.

Wigan Athletic aṭanga United zawmtu Antonio Valencia-a'n number 7 a ha ve ngawt a, pressure rit tak avangin a talbuai phah. Ecuadorian player hian jersey number 25 a ha zui a, United tan player pawimawh ni mah se number 7 erawh a hlawhtlinpui lo.

Kum 2014-ah Angel Di Maria a rawn lang a, Real Madrid aṭanga English club zawmtu hian number 7 rawn ha nghalin thawm nei lian mah se Louis van Gaal-a'n a chhawr fuh tawk lo bawk nen season khat bak a daih lo.

Dutch winger duhawm Memphis Depay pawhin Man United-ah jersey number 7 a ha a, English club-ah beisei a pha lo. Depay hi Lyon-ah hming a chher a, nipui bazarah Barcelona zawmin tunah chuan Catalan club-ah player pawimawh a nih bakah an ram Netherlands innghahna ni mah se Old Trafford-ah erawh sulhnu ṭha a hnutchhiah lo.

Arsenal aṭangin Manchester United-in Alexis Sanchez an thlem chhuak a, Chilean forward chungah hian beiseina sang tak neiin jersey number 7 a ha nghal. Amaherawhchu Alexis hian sum tam taka vur ni mah se United tan Premier League-ah goal thum chauh a khung a, English club-in a hralhchhuah dan an zawng nasa a, kum 2020 khan Inter Milan-in a nghetin an la thei hlauh a, an thaw huai ang.

Ronaldo rawn kir hmaa United number 7 ha hnuhnung ber chu Cavani a ni a, Covid-19 vanga inkhel entu an awm hleih theih loh avangin Old Trafford-ah Uruguayan striker hi a la tlatlum tawk lo. Chutihrualin kum 34 mi Cavani hian hrem leh quarantine vanga a inlan tam thei lo chungin league match 26-ah goal 10 a khung a, a che ṭha thawkhat hle.

CR7 chu
Kum 18 mi Ronaldo khan United legend-te jersey hak ṭhin number 7 kha phurritna nei miah loin a ha tawh. Sir Alex Ferguson-a meuhin 'Christmas tree' ti mawitu zinga a chung bera arsi nen hiala a khaikhin Ronaldo hi United number 7 ha tawha ṭha bera chhal theih a ni.

Ronaldo hian Real Madrid leh Juventus-ah pawh number 7 hi a larpui ta zel a, amah leh number 7 a in bet deuh chawt tawh. Portuguese forward hian CR7 hming chawiin thawmhnaw, perfume leh hotel te a nei a, Ronaldo tan he number hi a pawimawh takzet.

Amaherawhchu Cavani hnenah number 7 hi pek a nih tawh avangin PSG striker hlui thutlukna a pawimawh. Uruguayan forward hian harsatna siam loin phal takin number 7 hi a lo kian. Kum 36 mi Ronaldo chuan, "Number 7 hi ka la leh thei ang em, tih hi ka chiang lo. Hawihhawm taka min kiantu Edi (Cavani) chungah ka lawm hle," tiin a sawi ve bawk.

Zanin hian jersey number 7 hain Old Trafford-ah Ronaldo a kir dawn a, kum 18 liam taa kum 18 mi player beiseiawm kha a ni tawh lo. Tunah chuan Ronaldo hi football legend a ni a, khawvel player ṭha bik Pele, Maradona leh Lionel Messi te huangah dah a ni tawh. Old Trafford-ah mipui thawm a ring dawn a, khawvelin Manchester United leh Newcastle United an thlir ang.