Messi number hatu tur Fati!

Barcelona chuan an player ropui ber Lionel Messi kalsan tak jersey number 10 ha tur an zawng a, La Masia aṭanga inzirchhuak Ansu Fati chuan number 10 hi a ha dawn!

Catalan club chuan social media lamah thuchhuah siamin, "Kan number 10 thar - La Masia chhul chhuak a ni e," tiin Fati-a'n jersey number 10 a pawt pharh lai thlalak an pholang a, Spanish rawlthar duhawm tan mawhphurhna a sang dawn.

Paris Saint-Germain lama kal ta Messi-a'n Barcelona tan inelna hrang hrangah match 778 khelin goal 672-a khungsak a, assist vawi 305 a nei bawk - nomawi 35 a chawi a, heng zingah hian La Liga 10 leh Champions League pali a tel.

Kum 18 mi Fati hian Barcelona tan inelna hrang hrangah match 43 khelin goal 13 a khung a, assist vawi nga a nei bawk - nomawi chawi a la nei lo thung.

European tootball-a rawlthar beiseiawm ber pawl Ansu Fati hi November 7, 2020 khan Real Betis nen an inkhelh ṭumin a inhliam a, thla li chawl tura ngaih kha thla ruk chhungin vawi ruk zai a ni - ngai a awh leh ang em, tia zawhna lian tak a awm laiin jersey number 10 pek a ni!

Barcelona tan Messi bakah Rivaldo, Juan Roman Riquelme leh Ronaldinho te chuan number 10 hi an lo ha tawh ṭhin a, Barca thuneitute chuan Fati hma hian Philippe Coutinho an dawr phawt.

Mahse, Brazilian mid-fielder hian Messi jersey number kalsan tak hak chu phu loah inngaiin a hnar a, Fati hian lawm takin a lo pawm thung a ni - team training a zawm leh tawh a, international break zawhah chuan inlan thei tawh tura beisei a ni.

Number 11 ha ṭhin Ous-mane Dembele pawhin a jersey number thlakin Antoine Griezmann-a hak ṭhin number 7 a ha dawn a, 11 hi rawlthar duhawm Yusuf Demir chuan a chang thung ang.

Sevilla aṭanga lakluh thar Luuk de Jong chuan jersey number 17 a chang a, Manchester City-a number 10 ha ṭhin Sergio Aguero chuan number 19 a ha dawn thung.