Mizoram cricket roreltu Chhinga Veng CC
Chhinga Vengin 1st division nomawi an chawi hnuah Mizoram cricket inelna ngaihhlut leh sum tamna ber Mapuia Cricket League nomawi an chawi leh ta.
Nimin khan Suaka Memorial Cricket Ground, Sihhmuiah MCL final hmuhnawm tak khelh a ni a, 3C-in league round leh qualifier 1-a an ngam tawh hnu Zarkawt Lords chu wicket thumin an hneh.
Chhinga Veng FC-in Mizorama football inelna sang ber Mizoram Premier League bakah I Day Football leh MFA Super Cup nomawi an chawi a, MFA Futsal League hmasa berah Chhinga Veng club an champion leh a, cricket inelna ngaihhlutah Chhinga Veng club bawk an champion avangin infiamna huang chhungah he veng hming hi hriatreng a ni tawh ang.
Beisei phak lo
Ṭhumvawra vannei zawk Chhinga Vengin vawm hmasak an thlang a, an thlang sual lo. Zarkawt Lords tan opener Lalrempuia chu run pawh siam loin a out a, a dinpui Henry Lalsangzuala'n run li bak a siam thei bik lo.
Zarkawt tana Zahir Uddin (22 runs) leh G. Lalbiakvela (28) te an luh hnuah Lords beiseina a nung thar a, an hlim chhung erawh a rei lo hle - batsman ṭha pahnih an out hnuah Zarkawt batsman dang an che hleithei lo a, Saidingliana Sailo (12 runs) chu anni baka run siam hnem ber a ni.
Lords hian over 20-ah run 93 chiah an tlin a, wicket kua an hloh - batsman nei ṭha Chhinga Veng tan target huphurhawm a ni lo.
Mahse maw...
Chhinga Veng tan run 100 pawh tling lo target umphak thil harsa niin lang lo mah se an beisei ang ngawt erawhin a kaltluang lo - batsman chhuanvawr K. Vanlalruata chu run 16 chiah a siam hman tihin a out a, Durtlang tlangval hian qualifier 1-a an intawn ṭumin run kua chiah a siam tawh bawk.
K. Ruata vawm out tu Lalrempuia a che ṭha chhunzawm a, Lalthlamuana (15 runs) a vawm out ve leh - 3C tan batsman ding chhuak pahnih an out hnuah Abhay Joshi, Gaurav Singh leh Lalnuntluanga ten run riat bak an tlin lo a, 3C dinhmun a chhia.
Mahse, a hunah tak HM Ralte (20) leh Sumit Lama (24) te pangngai takin an rawn khel a, over 15.4-ah an target umphain 3C hian wicket sarih an hloh a, hnehna an chang.
Thawhrim rah
1st division champion an nih hnuah Chhinga Vengin MCL nomawi an chawi leh ta a, Mizoram cricket-a match 15 chhung tlawm tawh lo 3C coach Lalhriatpuia chuan an thawhrim rah a nih thu a sawi.
Hriatpuia chuan, "Team kan inlungrualna hi kan chakna a ni a, midang aia kan danglamna chu kan thawhrimna leh boruak ṭha hi a ni. Player naupang zawkten thu an awih a, tawnhriat ngah zawk player ten an pui ṭha em em bawk, " tiin Vanglaini a hrilh.
Chhinga Veng tlangval chuan Zarkawt Lords fak nghalin, "Team ṭha tak an nih avangin hmachhawn kan huphurh a, mah se kan vanneih ni a her chhuak ve ta a ni," a ti.
Opening fuh lo
Zarkawt Lords hi MCL-ah match thum an chak lo a, an ngam loh hi Chhinga Veng vek a ni. Zarkawt coach Lalruatsanga chuan, "Opening partner kan rem fuh thei lo a, chu chu kan chet chhiat chhan a ni. Run 100 tal target tuk thei ni ila chuan result a danglam ang. Bowling hi chu kan inchhuan vena a nih avangin ṭha takin kan ti ṭhin a, run 100 pawh kan tlin lo kha kan tuar a ni," tiin Vanglaini a hrilh.
Chanmari tlangval chuan, "MCL ṭantirh kha chuan point box ni tura ngaih kan ni a, kan chet ṭhat zui hi tumahin an ring lo," tiin champion lo mah se an thlen chinah a lawm thu a sawi.
Inkhel Result
Chhinga Veng 94/7 (15.4) bt Zarkawt Lords 93/9 (20)
*Wicket thumin Chhinga Veng an chak a, an champion.
Mimal Lawmman
Best Batsman K. Vanlalruata (262 runs), Chhinga Veng CC
Best Bowler C. Lalrempuia (17 wickets), Zarkawt Lords
Man of the Series K. Vanlalruata, Chhinga Veng
MCL 2018 Lawmman
Champion Chhinga Veng CC Rs. 115,000
Pahnihna Zarkawt Lords CC Rs. 65,000
Pathumna Chanmarians CC Rs. 40,000
Palina Kulikawn CC Rs. 40,000
Pangana Ramhlun Venglai CC Rs. 30,000
Parukna CrOM CC Rs. 30,000