Mumang a ni lo, Old Trafford-ah Cristiano Ronaldo a kir

Manchester United jersey ha tawh zinga player ropui ber Cristiano Ronaldo chuan Man United jersey a ha nawn leh dawn. Khawvelin Ronaldo chanchin a ngaihven a, a tawpa lawm ta ber chu Man United ṭantute an ni a, an lawmzia hi thua sawifiah chi a ni lo.

Kum 36 mi Ronaldo man hi euro maktaduai 15 a ni a, a chet ṭhat dan a zirin (add-ons) euro maktaduai riat an pek belh leh ang. Man United pek pelh theih dan ṭhenkhat hi a awlsam avangin English club hian Portugal Captain manah euro maktaduai 20 chu an seng ngei ngei tura ngaih a ni.

A hlawh tam
Ronaldo hi kum hnih chhung atan kar khatah £510,000 vel hlawh tura ngaih a ni a, Premier League player hlawh tam ber a ni dawn. A hnaih bertu chu Man City midfielder Kevin De Bruyne (£400,000) a ni a, hlawh sang pangaah Man United player pali ngawt an awm.

Man United keeper David de Gea-a'n kar khatah £375,000 a hlawh a, player thar Jadon Sancho (£350,000) leh Raphael Varane (£340,000) te an hlawh tam bawk. Tun nipui transfer-a man to taka lakluh Romelu Lukaku (£325,000) leh Jack Grealish (£300,000) te pawhin kar khatah £300,000 an hlawh tling ve ve. Grealish hi club leh ram tana a khelhpui Raheem Sterling nen an hlawh a inang.

France international midfielder pahnih N'Golo Kante leh Paul Pogba ten kar khatah £290,000 ve ve an hlawh. Pogba hian Man United-ah kum khat chiah contract a nei tawh a, Old Trafford-ah a cham zui dawn a nih chuan a hlawh tihsan ngei a ṭul dawn a ni.

Hlawh tam panga
Portugal captain hlawh hi a lang tam viau a ni thei a, chutihrualin Juventus-ah khan kar khatah £900,000 a hlawh nia sawi a nih avangin a lar chhuahna club Manchester United zawm tur hian a hlawh a tihniam nasa hle.

Tihian khawvela hlawh tam ber chu Lionel Messi a ni a, kar khatah £960,000 hlawh anga sawi a ni. Neymar-a'n kar khatah £606,000 hlawhin pahnihna a ni a, Atletico Madrid forward Luis Suarez-a'n kar khatah £575,000 a hlawh. Barcelona tlarhma innghahna ṭhin MSN te kha khawvela player hlawh tam pathum an la ni.

Atletico aṭanga Barcelona zawmtu Antoine Griezmann-a'n kar khatah £575,000 a hlawh a, Juventus aṭanga Man United zawmtu Ronaldo hi footballer hlawh hnem panga zingah a la tel pha tho.

A la ṭha
Euro 2020 neih zawh taka goal khung tam ber chu Ronaldo hi a ni a, season liam ta Serie A-ah pawh goal 29 khungin top scorer a la ni thei a, Capocannoniere award dawngin amah hnaih bertu Romelu Lukaku (24) aiin goal nga ngawtin a khung tam.

Ronaldo ropuina chu a kalna apiangah League nomawi a chawi. Man United tana a khelh hmasak khan season ruk chhungin nomawi pakua a chawipui a, Premier League pathum leh Champions League pakhat a tel. Real Madrid-ah season kua hmangin Ronaldo hian nomawi 15 a chawi a, La Liga pahnih leh Champions League pali ngawt a chawi leh bawk.

Juventus-ah Portuguese forward hian chona thar a hmachhawn a, season thum chhungin nomawi panga a chawi a, Serie A nomawi pahnih a chawipui. Ronaldo hian Real Madrid a pan hnuah season tinin goal 20 a khung tling ziah a, season 12 chhung goal 20 a khung ziah a ni satliah lo - hemi hun chhunga chawhruala a khung zat hi season khatah 32.67 a ni pha hem mai!

Man United website a buai
Manchester United-in Cristiano Ronaldo chungchangah Juventus nen Zirtawpni zan dar 9:20-ah inremna an neih thu an puang. Portugal captain chanchin ngaihventu an tam a, Man United website tlawhtu an tam avangin rei lote chhung chu an website a buai hial.

Ballon d’Or vawi nga chawi tawh leh nomawi 30 chuang chawi tawhtu Cristiano hi nizana Manchester United leh Wolverhampton inkhelh ṭumin a la inlan hman lo. Molineux stadium-a a inlan hman dawn chuan loh avangin Turin aṭangin Lisbon a pan a, Portugal khawpuiah hian medical a nei ang a, international match khel turin Portugal team a zawm ang.

Ngaihventu ngah Ronaldo
Manchester United chuan instagram account-ah Cristiano Ronaldo an lakluh thu an puang a, 'Welcome home Cristiano' tih an ziak. IG-a Man United post hi darkar 12 chhung lekin like-tu mi maktaduai 12.3 a nei a, 'sports team' thil post-a like-tu ngah ber a ni.

Ronaldo hi instagram-a mimal anga follower ngah ber a ni hrim hrim a, maktaduai 335 zet a nei tling. Manchester United erawh Ronaldo zarah follower an pung thung. United hian Ronaldo an lak hma hian follower maktaduai 42 vel an nei a, tunah chuan maktaduai 45.7 an tling tawh. Portugal captain hi a hlawh a tam a ni thei a, amaherawhchu official-a Man United-in an lakluh thu an puan hunah chuan a jersey thlengin hralh a kal dawn.

Ronaldo hian jersey number 7 a ha ṭhin a, United-ah erawh Edinson Cavani-a'n number 7 hi a ha mek. Uruguayan striker hi United-in chhuahtir tumna an neih loh avangin Ronaldo number hak tur hi hriatthiam a har hle.