Vur vangin Formula 1 test a buai

Nilaini khan Circuit de Barcelona-Catalunya-ah a vawi thum nan Formula 1 season thar inbuatsaihna neih tur a ni a, mah se intlansiakna tur hmunah vur leh ruah a tlak nasat avangin tlan mumal theih a ni ta lo.

McLaren driver Fernando Alonso chuan, "Vur chungah pawh car chu ṭha takin a tlan thei tho e," tiin an tlan kawngah vur a tam thu chu fiamthuin a sawi chhuak hial.

Intlansiak ṭan hun hi darkar thum ngawtin tih tlai a ni phawt a, driver ten tlan kawng chu car khalh theihna tur chi-ah an ngai lo. Red Bull driver Daniel Ricciardo leh Toro Rosso driver Brendon Hartley te chiahin lap khat aia tam an tlan lui thei.

Nimin khan Barcelona-ah hian a hnuhnung ber atan enchhinna neih leh tur a ni a, he thu buatsaih lai hian an tlan theih leh theih loh kan hre hman lo. March 6-9 chhungin pre-season test tawp ber neih a ni leh ang a, March thla tawpah Formula 1 season hi ṭan a ni ang.