Ferrari leh Mercedes inum tawk

Formula 1 season ṭan hun a hnai a, inpuahchahna neih chhoh mek a ni. Thawhlehni khan Circuit de Catalunya, Spain-ah tlan chhinna neih leh niin Ferrari leh Mercedes an in um tawk hle.

Tlan chhinna an neih ni hnih ni hian Ferrari driver Sebastian Vettel chu pakhatna a ni a, a hnung chiahah Valtteri Bottas a thleng–an inkarah hian second 0.303 chiah a awm. Champion lai Lewis Hamilton chu a inlan lo a, Britain driver inlan loh ṭum hian Mercedes tan Bottas-a'n rintlak a nihzia a pholang chiang hle.

Ferrari leh Mercedes te hi driver leh team championship lama inum ber tura ngaih an ni leh, chutihrualin Red Bull hi ngaihthah theih an ni bik lo. Vettel leh Bottas te hnungah hian Max Verstappen a thleng a, ani pawh hian a hma a thleng driver a phak lohna hi second 0.35 chiah a ni.