All England beiseitu Carolina Marin

Carolina Marin chuan beisei anga a khel ṭha thei lo chu insiam ṭhat a duh thu a sawi a, tun season boruak siam ṭhat chhoh nan thla leha khelh tur All England Championship-ah beiseina a neih thu a sawi.

World number 1 hlui Marin hian nikum September thla khan Japan Open title a la a, hemi hnuah nomawi dang a la chawi leh lo. Tun hnaia a khelh hnuhnung Malaysia Masters-ah khan semifinal lut ve mah se world number 1 Tai Tzu-ying a hneh lo.

Spain nula Marin chuan, "Rio Olympic hnuah hliam ka nei a, chumi hnu lamah chuan beisei angin ka la khel chhuak leh lo. Kuminah harsatna hrang hrang ka tawk chho ve a, court chhunga hlawhtlinna ka chang thei lo hian min ti lungngai hle,"

"Mahse, ka zam tihna a la ni lo a, season bul kan ṭan chauh avangin lungngaih lutuk tur a la ni lo. All England Championship kan khel dawn a, taksa leh rilru inpeih taka ka inlan a nih chuan ka thawhchhuah lehna hmasa a nih ka beisei," tiin a sawi.

Marin hian a khel bawr na vangin season hmasa tawp lam khan Hong Kong Superseries leh Dubai Superseries Finals a khel thei lo a, inelna a hmachhawn ṭhenkhatah a coach Fernando Rivas-a'n a ṭawiawm ziah loh bawk avangin result ṭha a nei hleithei rih lo.