Man Utd tan Bruno leh Pogba an vul

Manchester United chuan Premier League match hmasa berah an hmelma kumhlun Leeds United an mikhual a, 5-1 in an sawp. Inrinni tlai inkhelah hian Bruno Fernandes-a'n hattrick a siam a, Paul Pogba-a'n assist vawi li ngawt a nei.

Old Trafford khatin entu an awm a, Man United-in Fernandes hmangin goal an khung hmasa a, mipui thawm chu ring tak a ni. Leeds United-in second half ṭantirhah Luke Ayling-a goal ropui hmangin siphurh sut mah se mualneitu an phur sawt a, Fernandes-a'n hattrick a siam bakah Mason Greenwood leh Fred ten goal khat ve ve an khung.

Fernandes hattrick siam hnuhnung ber chu Sporting Lisbon-in Belenenses 8-1 a an sawp ṭum a ni a, May 2019 kha niin entu mi 5,000 chauh an awm. Leeds laka Fernandes hattrick siam lai erawh entu 76,000 an awm a, Euro 2020-ah beisei a phak lo mah se goal thum nena season bul a ṭan hian inrintawkna nasa tak a pe ngei ang.

Hattrick siamtu Fernandes chuan, "He club ropui tak tana hattrick siam tur hian Old Trafford khat hun hi ka nghak. In rawn kal avangin ka lawm e, nang ni nen hian football hi a hlu zual a ni," tiin twitter-ah a ziak a, mipui ṭhahnem tak pungkhawmte chungah lawmthu a sawi.

Manchester United player Jadon Sancho chuan minute 75-naah Daniel James thlakin khelmual a rawn rap a, mipui thawm a ṭha. English winger rual hian Anthony Martial a lut ve bawk a, goal erawh luh belh tawh loin 5-1 in inkhel a tawp.

Goal a sur - Man United-in goal nga an khung nghal
Manchester United-in Premier League match hmasa berah goal nga khungin Leeds United 5-1 in an sawp. Nikum December thla khan Ole Gunnar Solskjaer-a hote hian Leeds hi 6-2 in an sawp tawh a, tun ṭumah erawh mipui an awm tak avangin a ropui ta zawk.

Old Trafford pawn
Man United leh Leeds United te hi club inhal an ni a, entu an awm theih tawh avangin inkhelh hma aṭangin boruak a ṭang tawh hle. Inkhelh hma hian Old Trafford pawn lamah team pahnih ṭantute an intibuai a, mi paruk an man. Video darh aṭanga a lan danin fan ṭhenkhat chu an inphek sual a, Greater Manchester Police (GMP) chuan mi paruk an man. Panga hi insualnaa tel a ni a, pakhat hi ruihhloa inhnamhnawih a ni thung.

Old Trafford chhung
Covid-19 vangin thla 19 chhung entu mumal an awm thei tawh lo a, a awm meuh chuan boruak a danglam hle. Premier League kai thar Brentford-in Arsenal an hnehna kawngah pawh mipui an ṭangkai a, football hmuhnawm zawk chhawp chhuah a ni.

Man United leh Leeds United inkhelah pawh thawm a ṭha a, Argentine manager Marcelo Bielsa-a'n an mikhualna hmun Old Trafford-ah mualpho nawn pawisa loin attacking football khelh a thlang. Solskjaer-a'n player thar Jadon Sancho bench-ah a dah a, mimal thil avangin Edinson Cavani a la inlan theih loh bakah hliam vangin Marcus Rashford chhawr theih a ni lo bawk. Kum 19 mi Mason Greenwood chu tlarhmaah a awm a, Bruno Fernandes-a'n Greenwood hi a thlawp.

Midfield-ah Fred leh Scott McTominay te an inkawp a, mual sirah Daniel James leh Paul Pogba te an awm a, French midfielder erawh mual vei lamah awm mah se a ṭul huna mual laia lut thei turin zalenna zau tak pek a ni. David de Gea-a'n goal a veng a, Harry Maguire leh Victor Lindelof te inkawpin mual sirah Luke Shaw leh Aaron Wan-Bissaka te an awm. Solskjaer-a hote kim lo deuh mah se bul ṭantute hi season liam ta rinrawlte tho kha an ni.

1-1 a ni phawt
Goal chance a tam a, Leeds United keeper Illan Meslier-a'n hna a ngah. Mahni muala khel Man United player-te'n pressure an pe ṭha a, Leeds United lamin ball hloh an chin avangin Man United goal bawh a nat phah hle.

Greenwood-a'n Pogba tan ball duhthusam a pe a, French midfielder hian Meslier chiah hmachhawn mah se goal-ah a chantir lo. Pogba-a'n hun ṭha hloh hnuah a insiam ṭha a, player ṭha bik a nihzia a rawn pholang.
Minute 30-naah Meslier-a ball pet chhuah chu Scott McTominay-a'n a chang a, Scottish midfielder hian Paul Pogba pein French midfielder hian vawi khatnaah Bruno Fernandes tan a pe nghal. Portuguese midfielder hian Pogba pass chu ṭha zeta la thlain goal ṭha bik a khung.

First half-ah goal a luh belh lo a, second half ṭantirhah Man United tlarhnung an mutthlu zeuh. Minute 48-naah Luke Ayling chuan hmun awl a neih avangin goal a pan nghal a, kawh zetin a pet lut - De Gea dem theih a ni lo.

Old Trafford-ah Leeds United ṭantute an pawr thar a, an thawm a ring hle. Entu awma inkhel hlutna a lang a, goal vang chauh ni loin inkhel entu vangin inkhel a nung hle.

A goal mawlh mawlh
Manchester United-in goal an chhuah vangin an talbuai lo a, an ṭha sawt zawk. Player theihna sang bik danglamna a lang a, Pogba chu vei lam kil aṭanga tlan lut Greenwood tana lak nuam turin through ball ṭha bik a pe. United rawlthar Greenwood hian goal kilah a pet lut a, minute 52-naah hma an hruai lehnghal.

Pogba bawk hian defence karah mawi zetin a pass lut a, ball um luttu Fernandes-a'n hmun awl insiam turin a la kawi leh phawt a, minute 54-naah Man United goal thumna a khung. Leeds defender Ayling-a'n pet chhuak mah se 'goal line technology' hmangin goalline a pel hman tih hriat a ni.

Leeds tlarhnung a pherh a, Lindelof-a'n halfway line thlen hma aṭanga through ball pe lutin Fernandes-a'n hattrick siam nan a hmang. Minute 60-naah Man United-in 4-1 in hma an hruai a, an la duh tawk lo.
Minute 68-naah vei lam aṭanga Pogba pass chu Fred-a'n a pet goal a, Manchester United goal nga an khung. Ole Gunnar Solskjaer-a hoten duhthusamin Premier League an ṭan a; Southampton, Wolves, Newcastle, West Ham United leh Aston Villa te an hmachhawn dawn avangin Premier League hmahruaitu ni zel turin an dinhmun a ṭha hle.

Manchester United 5-1 Leeds United
MUN : Bruno Fernandes 30', 54', 60'; Mason Greenwood 52'; Fred 68'
LEE : Luke Ayling 48'

Man United: De Gea, Wan-Bissaka, Lindelof, Maguire (C), Shaw, Fred, McTominay (Matic 68'), James (Sancho 76'), Fernandes, Pogba (Martial 74'), Greenwood.
Inlan lo: Heaton, Dalot, Williams, Andreas, Mata, van de Beek.
Leeds: Meslier, Ayling, Koch, Cooper (C), Bamford (Roberts 76'), Raphina, Dallas, Rodrigo (Firpo 45'), Struijk, Harrison (Helder Costa 69'), Klich.
Inlan lo: Forshaw, Klaesson, Phillips, Summerville, Greenwood, Shackleton.

Solskjaer thlirna
Ole Gunnar Solskjaer chuan inkhelh banah media a hmachhawn a, Leeds United 5-1 a an hneh danah lawmna tur a ngah hle.

Team thawhrah
Kan vai thawhrah a ni. Mipui, player leh coaching staff te an tel vek. Engkim mai kha a dik vel vek a, match hmasa bera hetianga ṭhaa kan khel thei hi kan lawm em em a ni. Chutihrualin match khat chauh a ni tih hriat a ṭha a, match dang hmachhawn leh tura kan inpeih a ṭul.

Presssure?
Sir Alex khan, "Nuam ti takin khel ula, in theihna lantir rawh u," a ti ṭhin. Chuvangin mi 75,000 bakah TV katlanga mi maktaduai tam tak entu hmaa kan khel thei hi vannei kan inti zawk tur a ni. Kan thawkrim tih chu ka hria a, mah se 100% in kan fitness a la ṭha lo.

Puitling a ni ta
Mason Greenwood-a'n goal hnihna khung tura a tlan ka hmuh khan kum hnih liam taa naupang kha a ni tawh lo, puitling a ni tawh tih ka hre thei a ni. Season ṭan hmaa a fitness ti ṭha tura a thawhrimnaah ka lawm hle.

Pogba chungchang
Paul Pogba hi a naupan lai aṭangin kan inkar boruak a ṭha. Everton nen friendly match kan neih khan minute 45 a khel a, a khel ṭha tawk lo. Tun ṭumah erawh zalenna kan pe a, ball a channa tur a nih chuan khawi hmunah pawh a kal kan phalsak. Inkhel pakhata vawi li assist thei hi a thlen hnuhnun ber ṭum pawh ka hre lo a, Pogba hi chuan hetiang theihna hi a nei hrim hrim. Chutihrualin hmun a awl a neih theih nana tlansaktu a mamawh a, chutiang chu a nei a nih ngat chuan mi bik a nihzia a lantir ṭhin.

Tominay ve thung
Scott McTominay hi pre season-ah minute 20 chauh a khel a, chutah pawh chuan centre back-ah a khel. McTominay hi a fitness a ṭha em em a, ni lengin a tlan thei ang tih tur ang chi a ni. Tunah chuan a puitling lehzual tawh a, a khel ṭha takzetin ka hria.