Olympic thawnthu ziak danglamtu Flora Duffy

Mipui 63,000 vel chauh awmna ram Bermuda tan Flora Duffy chuan Tokyo Olympic neih laiah gold medal a hlawh chhuak. Bermuda rama mihring cheng zawng zawng hi Serchhip District (2011 chhiarpui - 64,875) nen an inzat tawk vel hle tihna a ni!

Nimin khan Duffy-i hian 'Triathlon' huangah gold medal a hlawh chhuak, hnehna chang tur hian darkar khat, minute 55 leh second 36 a hmang - amah hnaih bertu Britain mi Georgia Taylor-Brown (1:56.50) aiin minute khat chuangin a thleng hma zawk.

Triathlon hi inelna hautak zet mai a ni, inelna chhungah hian - tui hleuh (Swimming), thirsakawr khalh (Cycling) leh ke hmanga intlansiak (Running) te a tel; hlawhtling tur chuan taksa chak a ngai hle. A pumpuia an tlan belhkhawm hi 51km a ni.

Bermuda tan hian boxer Clarence Hill chuan 1976 khan bronze medal a lo la tawh, hemi ṭum hian Olympic medal la thei zinga ram te ber an lo ni tawh, tunah chuan gold medal la thei zinga ram te ber record an siam leh ta.

Mi tumruh Duffy
Tleirawl a nih laiin Duffy hian Great Britain aiawh tura sawmna a dawng a, mahse a hnawl - a pianna Bermuda aiawhtu nih a thlang zawk. Ram ropui lo leh te zawk ni mah se a chawr chhuahna a phatsan lo.

Naupan lai aṭangin infiamna tui mi tak a ni, khawvel pum huap inelna a hmachhawnah hlawhtlinna chang fo tawh mah se Olympic bikah erawh a tum ram thleng turin a nghah rei a ngai ve ngat ngat hle.

Beijing Olympic 2008 khan beisei a phak lo a, infiamna a chawlhsan. An ramah dawr nghakin hna a thawk a, zirna lam a chhunzawm bawk. Tunah hian BA (Sociology) a ni a, infiamna bakah zirna lamah pawh a duai lo.

An ramin a mamawh a, a tum hlen chhuak turin hmabak a la neih bawk vangin Tokyo Olympic hmachhawn turin a zuang lut leh a, tunah chuan Japan khawpuiah a naupan lai aṭanga a duhthusam chu a takin a tawng ta.

A lawm asin
Thawhṭan zan ruah sur nasa vangin nimin zinga inelna neih tur hi a hun pangngai aiin minute 15-in an sawn tlai hret. Kawng huh leh nal deuh lai awm mah se Duffy hi a talbuai lo, a tir lama hmahruaitu a nih aṭangin a hawi kir tawh lo.

Kum 33 mi Duffy chuan, "Kum nga chhung chu rilru khingbai angreng takin ka awm. Beijing Olympic hnuah kha chuan ka hun a liam tawha ngaihna kha ka nei, mahse beisei a tlem hnuah lawmna chu a rawn her chhuak.

"Bermuda mipui chu lawm avangin an lam tih ka hria, chu chuan min tihlim ber. Mimal hlawhtlinna a pawimawh rualin Olympic ngeia kan ram puanzar chawisana a awm hi ka tan chuan a hlu," a ti.

Duffy-i'n Olympic gold medal la tura a tlan 51km hi an ram sei zawng (40km) aiin a sei zawk. North Atlantic tuipuia thliarkar tereuh te a ni a, United States khawpui pakhat New York aiin an ram pumpui hi a let 15 velin a zim zawk.