Coach inang lo; duh inang; huaisen pahnih!

Euro 2020 final-ah England leh Italy an intawng dawn a, team pahnih intawng tur chanchin a ngaihnawm tluk zetin coach pahnihin ngaihven an hlawh.

England coach Gareth Southgate hi player a nih lai pawha ṭhiante chhan ti na tak, player langsar vut ni lem lo, mahse, huaisen tia an sawi ṭhin a ni.

Roberto Mancini erawh player lar ve tak, mahni induh tawk tak, a kawhmawh bawl chin avanga a nih tur ang ni phak lo ang hiala sawi a ni a, coach a nih hnuah pawh he zia hi a la thlah lo hle.

An inanna erawh hei hi a ni - an thinlung zawng zawngin ram an hmangaih a, chu an ram hmangaihna thinlung chuan ram tana nomawi chawi turin a hnuk kal a, an ram tan an nunna hlan hial pawh an hreh lo ang!

96 mangchhia
Southgate-a chanchin sawi chuan Euro 1996 sawi a ṭul leh ṭhin - semifinal-ah England leh Germany an inkhel a, hun pangngaia an inhnehtawk hnuin penalty hmanga chak zawk zawn a ni.

Team pahnih tan pet tura ruat sa player panga ve ve ten an pet goal vek a, a dang thlan belh a ngai. Terry Venables-a'n penalty pet ngam a zawng a, player dang zawngin thlan hlau taka lei lam an bih laiin Southgate-a'n a ban a phar!

Mahse, Southgate-a'n a team chhandam turin a huaisenna pholang mah se a team a chhanhim zo lo a, penalty a pet goal lo - pawi tih hmel taka a kal hnak hnakte kha mitthlaah hian ava cham rei ta em. Hetihlaia England striker Alan Shearer chuan, "Khatiang ang hun harsaa penalty pet ngam kha chu, tupawh nise, ka sawisel thei lo," tiin Southgate-a huaisenna a fak.

Nghilh har mangchhia
Southgate-a'n England tana tihsual siam ṭhat tumin a theih ang apiang a ti a, mahse, player a nihna ang chuan chance a nei leh tawh lo.

Chu mai a ni lo - Rio Ferdinand leh Sol Campbell awm hnuah phei chuan ram tan a inlan pha ta meuh lo a, hetihlaia Three Lions boss Sven-Goran Eriksson chu player ṭha zawk a nih theih dan tur hrilh turin a rawn hial!

Mahse, engkimin hun a nei a, ni pawhin zanah thla leh arsi tan hmun a ken a ngai angin Southgate-a hun a liam tawh a, England team indinthar mekah a tan hmun a awm lo thuai zui.

Southgate-a'n player a nihna anga a tihsual lian tak thai bo turin player a nih lai vekin chance a nei zui lo a, a thinlunga 1996 cham reng chungin a football boot a khai - a na asin.

Chhum kara chhimbal
Kum 2016 khan English coach chanchin ngah ve tak Sam Allardyce chu Three Lions coach tura ruat a ni a, match khat chiah a kaihruai hman tihin chanchin lawmawm lohin a zui - thamna sum inhnamhnawih avangin Big Sam hi a bang a, English football hun thim tia an sawi hi Southgate tan erawh hun duhawm a ni.

Chhum zing chuai karah Southgate-a tan chhimbal a zam a, World Cup 2018 khel tura England a tlinpui hnuin a nghet atan lakluh a ni a, kum li chhung atan contract an ziahpui.

Middlesbrough coach hlui hian kum 1990 hnua a vawi khat nan World Cup semifinal-ah England a hruai thleng a, a la duhtawk lo cheu - Euro final meuh a hruai thleng ta.

Southgate hian a result duhawm tak hmangin a mangchhia chu a thai reh a, 1996 an sawichhuah apiangin Euro 2020 a sawi ve thei tawh ang - mahse, he coach hian pen khat chiah pen leh hram a la duh fan a, nomawi a chawi chiahin a lawm a kim ang.

Italian rawlthar sual
Southgate-a'n a penalty hlah vanga a hliam dam lo chu tuam dam hna a thawk mek a, Roberto Mancini-a'n a sual vanga a hliam dam lo tuam dam a tum ve mek bawk - an hliam neih dan a inang lo a, tuam dam an tum dan erawh a inang thung.

May 1984 khan Mancini hi New York-ah Italy tana feh chhuak zingah a tel a, USA nen friendly match an khel. Hetihlaia kum 19 mi, Sampdoria forward beiseiawm hi zanah coach-te hriat lohin a leng chhuak a, amah leh amah a intichhia.

Hetihlaia coach Ezio Bearzot chuan Mancini a ko a, ṭawngkam chhe tinrengin a hau a, a dim lo. Kum 1982 World Cup-a Italy champion puitu coach hi Mancini a ngaihtuah luatah zankhuain a mu thei lo a, "League-ah goal 40 khung pawh ni la, ka ko tawh lo ang che," a ti!

World Cup 1986-ah rawlthar duhawm Mancini tan hmun a awm lo zui a, a hnuah Bearzot chuan, "I lak aṭanga ka beisei chu ngaihdam dilna a ni a, mahse, engmah ka dawng si lo," tiin ngaihdam dil se chuan a squad-ah a tel tur thu Mancini hi a hrilh a, Mancini chuan, "Khatihlaia ka châk ber chu 'thih' a ni," tiin a sawi zui.

Khua a var thei lo
Bearzot-a ban hnuah Italy under-21 coach Azeglio Vicini-a'n lawm takin Mancini a lo kuah a, Euro 88-ah a ko zui. Match hmasa berah Italy-in inelna thlengtu West Germany chu 1-1 in an inhnehtawkpui.

He inkhelah hian Mancini-a'n goal a khung a, a ṭhiante nena lawm ta mai lo chuan journalist ho ṭhutna media box lam a pan a, a hmuia a kut dah chungin ngawi turin a hriattir - tawnhriat nei tam Alessandro Altobelli aia Mancini an ko hi Italian media tam takin an sawisel vang a ni.

Italy-in semifinal an thleng a, Soviet Union-in an zinkawng an tihtawp sak - kum 23 mi Mancini tan major tournament-a hmun pawimawh a chan hnuhnung ber a ni zui. World Cup 1990-ah squad-ah telh ni mah se Toto Schillaci leh Roberto Baggio a tluk loh avangin inkhel entu a ni tluan.

World Cup 1994-ah khan team-a tel tura ngaih a ni - mahse, coach Arrigo Sacchi-a'n Germany nen friendly match an khelhah 90 minutes khelhtir a tiam chungin a khel lo a, Baggio awm loh lai takngial pawha khelmuala minute 90 a hmang thei lo chu a tlawmngai takzet. Mancini-a'n coach a chhuahchhal zui a, "Ram tan min ko leh tawh suh," a ti!

A tawpah beiseina
World Cup khel tura kar ruk chauh a awm tawh tihah Mancini-a'n ram tana inkhelh a chawlhsan a, a hnuah erawh a inchhir - coach ropui tak niin Fiorentina, Lazio, Inter Milan leh Manchester City-ah hna ropui thawk mah se a duh a kim thei lo.

January 2018 khan Gazzetta dello Sport-in an kawmnaah, "Duhthusam ka nei a, chu chu player ka nihna anga ka champion lohna World Cup champion nih a ni," a ti - a mak asin, Italy-in England ang thoin kum 2018-ah hun thim an tawng a, World Cup an khel phak lo a, coach Gian Piero Ventura an ban.

Mancini tan hun duhawm a her chhuak a, Italy enkawl turin ruat a ni. Player a nih lai ang thoin Mancini a la rorum reng a, thutlukna siam kawngah a huaisen a, player 35 zet chu ram tana an match hmasa ber a khelhtir a, Italy ṭhat dan tur a zawng kual nasa.

July 11 a thlen dawn meuh chuan Euro final khel turin a team a buatsaih ta - Mancini-a'n a duh angin Italy team ṭha tak a din tawh a, "Nipui chawlhah chuan champion coach ni chunga Portonovo (an khaw bula chawlh hahdamna) khuaa 'autograph sign' ka beisei," a ti - match khat chiah a ngai tawh.