Kolkata Derby Tu nge dingchang zawk dawn?

Pathianni tlai dar 2:00-ah Indian football-a inkhel ngaihven hlawh ber pawla chhal ngam inkhel hmuh tur a awm dawn – East Bengal leh Mohun Bagan ten Kolkata Derby an khel dawn.

Kolkata club lian pahnihin tun season I League-ah beisei an phak rih lo ve ve a, East Bengal-in hnehna an chang zo lo a nih ngat chuan Khalid Jamil-a dinhmun a derthawng tawh a nih pawhin a mak lo ang – Bagan hi an coach Sanjoy Sen nen an inṭhen fel der tawh.

Khalid-a thawnthu
I League-ah Aizawl FC a champion pui miau avangin Khalid Jamil hi coach ṭha huang chhungah dah loh chi a ni lo a, Mizo club-a a contract a hman zawh tawh avangin East Bengal-in Indian coach awm tawh zinga hlawh hnem ber ni turin an lalut–an tihsual dawn leh dawn loh erawh a la hriat loh.

East Bengal hian an match hnuhnung paliah vawi khat chiah chak hmel an hmu a, Neroca, Churchill Brothers leh Aizawl FC-te inhnehtawkpui vekin an hneh awmchhun hi Indian Arrows an ni – tun season-a Bagan nen an intawn hmasakah East Bengal hian Aizawl FC defender hlui Eze Kingsley an ngam lo a, 1-0 in an tlawm. East Bengal fan-ten nomawi beisei laia a zawna derby-a tlawm an duh lo ang.

Khalid-a ṭang
Aizawl FC nen an inhnehtawk zawh hnuah Khalid-a'n, "Aizawl FC-ah ka hna ṭha takin ka thawk a, tunah chuan East Bengal ta ka ni tawh. He club tan hian ka theihna zawng zawng ka pe dawn a, ka hna hlen ka tum a ni," tiin a sawi a, Kolkata club hi champion nomawi chawipui ngei a tum.

Khalid-a'n Mizo club lama a hman thiam tawh sa Brandon VL Remdika, Laldanmawia Ralte leh Lalramchullova te East Bengal lamah pawh a chhawr rim a, RG Stadium-a inkhel tura an rawn kal ṭumin Mizo player-te hi a tir lamah Mizorama an cham khawtawi phal sak mah se Kolkata lamah a hruai leh nghal vek – derby atan inpuahchahna tih khawtlai a tum lo.

Bagan an buai
Season laklawhah coach Sanjoy Sen-a'n banna a thehluh miau avangin Bagan an buai tih hai rual a ni lo a, assistant coach Shankarlal Chakraborty chu coach puitlingah hlankai a ni. Shankarlal enkawlna hnuaiah Bagan hian 2-0 a Aizawl FC an hneh nghal avangin harhtharna an changah a ngaih theih a, mah se 2-1 in Minerva Punjab an hneh lo zui.

Minerva laka penalty pet goal lotu Ansumana Kromah chu chhuahtir nghal a ni! Champion tur chuan Mohun Bagan hian East Bengal aiin chak an mamawh zawk – Khalid-a nauten match 10 khelh tawhah point 19 hmua pahnihna an nih laiin Bagan erawh match kua khelh tawhah point 13 chauh an la nei a, East Bengal hi hneh pawh ni se an la umpha dawn chuang lo tihna a ni.

Team thar?
Mohun Bagan-in Kromah an chhuah zalen hnuah a hmun ruak luahkhat turin Akram Moghrabi an lalut a, Lebanon international hi player tawnhriat nei ngah leh theihna sang tak nei a nih avangin danglamna thlen turin a ṭha tawk – Shankarlal-a'n a duh chuan East Bengal lakah a chhawr thei tawh dawn a, Lebanese midfielder hi a chhawr ngei pawh a rinawm.

Ansumana Kromah an chhuah zalen hnuah Kolkata club hian Indian Super League lama Atletico de Kolkata champion pui tawhtu Fikru Teferra chu inbiakna an neihpui a, Ethiopian striker hi derby-a chhawr hman ngei turin inbiakna neihpui mah se he thu buatsaih lai thleng hi chuan thu chiang a la awm lo – Fikru hi an lak hman chuan season khata nuai 40 hlawh chunga beisei phak lo Aser Dipanda Dicka an chhuah ang.

Norde tel lohna
Mohun Bagan chet chhiat chhana puh theih chu an player chhuanvawr Sony Norde inhliam hi a ni. Season khata nuai 200 chuang hlawh player hian league match kua an khelh tawhah match li chiah a la khel a, derby khelh ngei a duh tawh. Mahse, Haitian winger hian club training zawm lui mah se a khup na a la tih avangin a ṭhiante angin a la inkhel thei lo a, East Bengal a hmachhawn a rinawm loh.

East Bengal-in an ram pawn player zingah Charles D'Souza an chhuah zalen ve bawk a, Chennai City aṭanga an lakluh player hmun ruak luah tur hian veteran striker Dudu Omagbemi an lalut. Nigeria tana vawi hnih inlan tawh striker hian India-ah sulhnu a nei ṭha tawh a, East Bengal, Pune City, FC Goa, Mohun Bagan leh Chennaiyin FC tana lo khel tawh a nih avangin Derby-ah inkhel bul a ṭan a nih pawhin a buai lo ang.