Joshua leh Parker an inhnek dawn
British boxer rothap Anthony Joshua chuan Joseph Parker a hmachhawn tur thu a tichiang ta a, boxer pahnih hi March 31-ah Cardiff khawpuiah an inhnek dawn–kum 28 mi Joshua hi IBF leh WBA heavyweight champion lai a ni a, Parker hi WBO champion a ni thung. Boxer pahnih hian an belt hi an dahkham ve ve ang.
Joshua promoter Eddie Hearn chuan, "He fight kan hlawhtlin tir thei tur hi ka hlim takzet a, hun rei tak aṭang khan kan lo buaipui tawh a ni. Tun hi world heavyweight champion lai pahnih Britain-a an intawn hmasak ber tur a ni," tiin thawnthu thar ziaha a awm tur thu a sawi.
Vawi 20 inhnek a hmachhawna a khingpuite knockout vek thei Joshua chuan, "Kan hmaa thil inchhawp hi awlsam taka thil thleng tur a ni lo a, tihtur tam tak paltlang hnua thleng ve thei chauh tur a nih avangin Parker-a leh a team-ten he fight neih ngei an duh hi ka lawm takzet a ni. Inhnek hlan ka nghakhlel tawh a, training kan beih ṭan tawh avangin March 31 chu a ni thuai mai ang," tiin hun kal chak thu a sawi.
Parker-a aiawhtu David Hig-gins chu kar hmasa khan Joshua leh Parker an inhmachhawn ngei theih nana tihtur ṭul te ti fel turin UK-ah a zin tawh a, inremna ang chuan Parker hi sum hmu tlem zawk tur niin inhnekna aṭanga hlawkna 30 aṭanga 35% a dawng ang.
Vawi 24 inhnek a hma-chhawna tlawm hmel la hmu lo, mi 18 knockout tu Parker chuan, "Anthony Joshua hian ring chhungah a beisei loh thil a tawng dawn a ni. Thla rei lote liam taah khan 'New Zealand aṭanga lokal he nau lakah hian engvangin nge ka lungphang ang?' tiin a lo sawi tawh a, tunah chuan a chhanna pek a ni dawn ta. Khawvel hian AJ hian hnek a dawl tak tak leh tak tak loh an hre thuai ang," tiin a ṭawng pawr hle.
March thlaa boxer pahnih inhneka chak zawk hian tlawm hmel la hmu lo ve tho Deontay Wilder an hmachhawn a rinawm a, American boxer rothap hian WBC heavyweight kawnghren a kawl mek–Wilder hmachhawnnaa chak chuan heavyweight kawnghren pali an kawl dawn tihna a ni a, boxing chanchinah a ruala heavyweight kawnghren pali kawl thei an la awm ngai lo.