NBA Finals : Suns hmaah Bucks an ding dawn

Regular season an zo a, thla khat chuang playoff an khelh leh hnuah NBA chu a hmawr bawk a ni dawn hnai ta. July 7, Nilaini zing dar 6:30 aṭangin NBA Finals game 1 an khel ṭan ang.

Phoenix Suns leh Milwaukee Bucks ten basketball thiam ber nih an inchuh dawn. Inelna hi best-of-seven series a nih avangin champion tur chuan vawi li tal chak tlin a ngai dawn, inkhel hmuhnawmin min hmuak.

Sulhnu
Eastern Conference-ah pathumna ni chungin Milwaukee Bucks hian playoff an khel a, an khingpui tur Phoenix Suns hi Western Conference lama pahnihna an ni thung - regular season hmang ṭha ber pahnih chu an ni lem lo.

Regular season bikah khan team pahnih hi ṭum hnih an intawng, record nei ṭha zawk Phoenix hian vawi hnih hnehna an chang. An intawn hnuhnung zawk April 19 khan Suns hi 128-127 in an chak hram, an inthlau lo hle tihna a ni.

Game 1 khelhna tur hi Suns khelmual Talking Stick Resort Arena a ni dawn, an mualah hian vawi 27 chakin ṭum kua chauh an tlawm - game 1 bikah pawh hian rinkai an ni dawn; Bucks tan fimkhur taka khelh a ngai ang.

Hliam an awm
Bucks innghahna chu Giannis Antetokounmpo a ni ṭhin. Mahse, NBA Most Valuable Player vawi hnih ni tawh hi conference finals khelh laiin a inhliam - NBA Finals tir lamah pawh a inlan thei dawn em, tih a la chiang lo.

Giannis awm loh hlanin Khris Middleton leh Jrue Holiday ten an mawhphurhna an hlen ṭha tawk, anni pahnih hi Suns lakah pawh an hmachhuan tur an ni leh dawn a, an che ṭha a nih chuan chak beiseina an nei thei ang.

Phoenix Suns tan Chris Paul a pawimawh dawn. Kum 36 mi Paul hian season 16 zet a lo nghah tawh NBA Finals a khel dawn, conference finals game 6-ah point 41 zet neiin a team a chakpui a, Bucks lakah pawh khelh ṭhat chhunzawm a tum dawn.