RB Leipzig-in point 3 an sual chhuak

RheinEnergieStadion-ah Thawhṭanni zan khan RB Leipzig-in FC Cologne 4-2 in an hneh a, Julian Nagelsmann hote hian point thum hlu tak an hlawhchhuah avangin pathumnaah an inhlangkai.

Mualneitu FC Cologne-in Jhon Cordoba hmangin hma an hruai a, mikhual Leipzig-in Patrik Schick, Christopher Nkunku leh Timo Werner te hmangin an chhanglet. Cologne hian Anthony Modeste hmangin beiseina thar nei mah se Leipzig tan Dani Olmo-a'n goal a khung leh tak avangin mikhual team-in harsatna lutuk nei loin hnehna an chang.

Covid-19 hnua inkhelh ṭan a nih hnuah RB Leipzig-in result ṭha neih an harsat a, match thumah vawi hnih an inhnehtawk. Match linaah pawh Nagelsmann hoten Timo Werner hmangin goal hlauhawm nei hmasa mah se Cologne-in goal an khung hmasa zawk.

Minute 7-na lekah Elvis Rexhbecaj ball pet chu Leipzig keeper Peter Gulacsi-a'n khawih pha loin goal ban a per a, hemi per let hi Jhon Cordoba-a'n a chang. Colombian striker hian rilru fim takin goal-ah a chantir. Minute 10 pawh a ral hmain Cologne-in 1-0 in hma an hruai.

Minute 20-naah Leipzig-in an chhanglet a, Manchester City aṭanga an hawh Angelino-a'n vei lam aṭangin ṭha zetin a cross a, Patrik Schick-a'n mawi zetin a tauh lut. Cologne harsatna belhchhah turin goal khungtu Cordoba chu Leipzig defender Dayot Upamecano nen an insut avangin a khup a hliam a, minute 24-naah French striker Modeste-a'n a rawn thlak.

First half-ah Leipzig-in hma an hruai a, Konrad Laimer through ball ṭha zet chu Christopher Nkunku-a'n um lutin keeper Timo Horn a chip khum nalh hle. Second half ṭantirah Timo Werner a rawn lang a, Cologne offside trap bumin keeper Horn chiah a hmachawn hnuah a pet goal.

Subsitute Modeste-a'n Cologne beiseina a siam a, Hoffenheim striker hlui hian minute 50-naah box pawn aṭangin kawh zetin a pet goal. Amaherawhchu minute sarih hnuah Dani Olmo-a'n box pawnah chi ai loin goal ruakah tak a pet lut a, RB Leipzig 4-2 in an chak. 

Cologne tana goal khungtu Anthony Modeste hian Lammualah Hoffenheim jersey hain goal a khung tawh a, hemi ṭuma German club manager hi tun ṭuma Cologne manager Markus Gisdol hi a ni a, an la inzui zel.

Kum 32 mi Modeste hian goal a khung zawh hian Minneapolis police kut tuara thi George Floyd tan a hlan. Cologne striker hma hian Bundesliga player langsar Weston McKennie, Marcus Thuram, Jadon Sancho leh Achraf Hakimi ten khelmualah  George Floyd thah a nih avanga an lungawi lohna an lantir tawh bawk.